દર્દ:સેવાના બદલામાં ઘર ખાલી કરવાનું એવું દર્દ મળ્યું કે જે ઘા પર જલદી રૂઝ ના આવી

કોરોનાના કપરા કાળની ભયાવહ યાદોને પાલનપુર સિવિલના ડો. અમિત વાઘેલા હવે યાદ કરવા માંગતા નથી. સેવાના બદલામાં એવું દર્દ મળ્યું કે જેના ઘા પર જલ્દી રૂઝ આવી જ નહીં. એટલે એ ખરાબ સમયને જલ્દી ભૂલવા માંગે છે. ડો. અમિત વાઘેલા કોરોનાનો પહેલો કેસ આવ્યો ત્યારથી જ ફિજિશિયન તરીકે ફરજ બજાવી રહ્યા છે. એમણે જણાવ્યું કે, શરૂઆતના અઢી મહિનામાં 500 લોકોની સારવાર દરમિયાન એકપણ દિવસ રજા લીધી નહીં. જમવાનું ન ભાવે તેમ છતાં રોજ હોટેલનું પરાણે જમવું પડ્યું.

જૂન મહિનામાં સંક્રમિત બનેલા અમિત વાઘેલાને પોતાનો ફ્લેટ ખાલી કરવો પડ્યો. તબિયત વધુ લથડી તો સ્ટર્લિંગમાં ભરતી થવું પડ્યું. હોસ્પિટલના આઇસીયુ બેડની પથારીએ એક તબક્કે લાગ્યું હવે નહીં બચાય ત્યાં જ આત્મ વિશ્વાસ વધાર્યો અને જીત હાંસલ કરી. ફરી દર્દીઓની સેવામાં લાગ્યો, હવે એ બધું યાદ કરવું અઘરું છે.