મિલન:જેસોરના જંગલમાં ભૂલી પડેલી મહિલાનું પતિ સાથે મિલન થયું

અમીરગઢ નજીક જેસોર રીંછ અભ્યારણ્યમાં ઘનઘોર જંગલમાં રીંછોના વસવાટ વચ્ચે બે સંતાનોની માતા ભૂલી પડી હતી. જેને બનાસકાંઠા અભિયમની ટીમે કડકડતી ઠંડી ભરી રાત્રી માથે લઇ તેના પતિ સાથે મિલન કરાવ્યું હતું. બનાસકાંઠા જિલ્લામાં અભિયમની ટીમ દ્વારા ઘરેથી નીકળી અમીરગઢના જેસોરના જંગલમાં રીંછોના વસવાટ વચ્ચે ભૂલી પડેલી એક મહિલાને તેના પતિ સાથે મિલન કરાવવામાં આવ્યું હતું.

181 અભિયમ મહિલા હેલ્પલાઇનના કાઉન્સેલર જિનલબેન પરમારે જણાવ્યું હતું કે, પાલનપુર તાલુકાના માલણ ગામ નજીક એક અજાણી મહિલા રાત્રીના સમયે એકલી બેઠી હોવાનો કોલ આવતા મહિલા પોલીસ કોન્સ્ટેબલ વર્ષાબેન મહેતાની સાથે સ્થળ પર પહોંચ્યા હતા. જ્યાં તેની પૂછતાછ કરતાં તેને પોતાનું નામ (લાડલીબેન) અસ્થિર મગજની હોવાનું જણાયું હતું. અને તેણે જણાવેલા સરનામાં પ્રમાણે પરિવારની શોધખોળ આદરી હતી.

કડકડતી ઠંડી વચ્ચે જેસોરના જંગલમાં ત્રણ કલાક સુધી શોધખોળ કર્યા બાદ રાત્રે દોઢ કલાકના સુમારે અમીરગઢ તાલુકાના ડાભેલી ગામે ડુંગરો વચ્ચે તેનું ઘર મળી આવ્યું હતું. જેને સહી સલામત તેના પતિને સોપવામાં આવી હતી.