ક્રાઇમ:આખોલ ગામેથી જીપડાલાના ચાલકનું અપહરણ કરી રૂ. 60 હજાર માગ્યા

ડીસાના આખોલ ગામ નજીકથી બે અજાણ્યા શખ્સોએ ચાલક સાથે જીપડાલાનું અપહરણ કરી રૂ. 60,000ની માંગણી કરી હતી. જોકે, મોડી સાંજે પરત મુકી ગયા હતા. આ અંગે ડીસા રૂરલ પોલીસ મથકે નોંધાયેલી ફરિયાદના આધારે પોલીસે વધુ તપાસ હાથ ધરી છે.આ બનાવે ચકચાર જગાવી છે.

ડીસા રબારી ગોળીયાના ગોવાભાઇ વિહાભાઇ રબારી પોતાનું પીકઅપ ડાલું નં. જીજે. 08. એયુ. 4690 લઇને આખોલ નજીકથી પસાર થઇ રહ્યા હતા. જ્યાં બંપ આપતાં વાહન ધીમું પાડયું હતુ. તે વખતે બે અજાણ્યા શખ્સો ઉપર ચઢ્યા હતા. જેમણે ચાલક સાથે જીપડાલાનું અપહરણ કર્યુ હતુ. અને ગોવાભાઇના ફોન ઉપરથી તેમના કાકાને ફોન કરી રૂપિયા 60,000ની માંગણી કરી હતી. જોકે, આ અંગે તેમના કાકા જોરાભાઇ કરણાભાઇ રબારી ડીસા રૂરલ પોલીસ મથકે ફરિયાદ નોંધાવી રહ્યા હતા. તે વખતે કોઇ અજાણ્યો શખ્સ ગોવાભાઇને પરત મુકી ગયો હતો. તેમજ જીપડાલું પણ રાત્રે કોઇ પરત મુકી ગયું હતુ. આ અંગે પીએસઆઇ એસ. એસ. રાણેએ વધુ તપાસ હાથ ધરી છે.