આગની ઘટના:પાલનપુરમાં આવેલા નેશનલ મેડિકલ એજન્સીના ગોડાઉનમાં લાગી આગ, દવાનો જથ્થો બળીને ખાખ

પાલનપુરના અમીરરોડ પર આવેલા નેશનલ મેડિકલ એજન્સીના ગોડાઉનમાં આગ લાગવાની ઘટના સામે આવી છે. ઘટનાની જાણ થતાં પોલીસ અને ફાયર વિભાગની ટીમો ઘટના સ્થળે પહોંચી આગ પર કાબૂ મેળવ્યો હતો. આ આગ શોર્ટ-સર્કીટના કારણે લાગી હોવાનું પ્રાથમિક અનુમાન થઈ રહ્યું છે. જોકે આ અંગે થયેલા નુકસાનનો કોઇ ચોક્કસ આંકડો હજુ જાણવા મળ્યો નથી.

અચાનક આગ લાગતાં ફરાતફરીનો માહોલ
રાજ્યમાં અવાર નવાર આગ લાગવાના બનાવો સામે આવે છે. જ્યારે આજે પાલનપુરના અમીરરોડ પર આવેલા નેશનલ મેડિકલ એજન્સીના ગોડાઉનામાં આગ લાગી હતી. અમીરરોડ આવેલ બેંક ઓફ બરોડાની ઉપર નેશનલ મેડિકલ એજન્સીનું ગોડાઉન આવેલું છે. જેમાં અચાનક આગ લાગતાં ફરાતફરી મચી ગઇ હતી.
​​​​​​
મોટા પાયે દવાઓનો જથ્થો બળીને ખાખ
ઘટનાની જાણ થતાં ફાયરની વિભાગની ટીમ દોડી આવી હતી અને આગ પર કાબુ મેળવ્યો હતો. જોકે, સદનસીબે આ આગમાં કોઈ જ જાનહાની થઈ નથી, પરંતુ મોટા પાયે દવાઓનો જથ્થો બળીને ખાક થઈ છે. જ્યારે શોર્ટ-સર્કીટના કારણે આગ લાગી હોવાનું પ્રાથમિક અનુમાન થઈ રહ્યું છે.