ક્રાઇમ:પિતાના મોત બાદ પુત્રોએ ખોટું વસિયતનામું બનાવી મિલ્કતમાં બહેનનું નામ કાઢી નાખ્યું

પાલનપુર ઉમિયાનગર લક્ષ્મીપુરામાં રહેતા એક પરિવારમાં પિતાનું મોત થયા પછી બે પુત્રોએ મિલ્કતમાંથી પોતાની બહેનનું નામ કમી કરવા માટે ખોટું વસિયતનામું બનાવી કચેરીમાં નોંધ પડાવતાં બહેને બે ભાઈ તેમજ સાક્ષી તરીકે સહી કરનારા સહિત 4 સામે પાલનપુર પોલીસ મથકે ફરિયાદ નોંધાવી હતી.

પાલનપુરના માધુભાઇ જોઇતાભાઇ પટેલનું મોત થયા બાદ તેમના પુત્રો જીતેન્દ્રભાઇ માધુભાઇ પટેલ, જયેશભાઇ માધુભાઇ પટેલે પિતાની મિલ્કતનું વસીયત નામું બનાવ્યુ હતુ. જેમાં સહિ કરવા અંગેનો કોલ આવતાં તેમની બહેન ધમિષ્ઠાબેન જેહુલભાઇ ગેહલોત કચેરીએ ગયા હતા. જોકે, પિતાની સહી અને વસિયતનામા વિશે શંકા જતાં તપાસ કરી હતી. જેમાં બંને ભાઇઓએ પિતાની ખોટી સહિઓ કરી સિદ્ધપુરના ગણપતભાઇ જોઇતાભાઇ પટેલ અને રમણભાઇ ગણેશભાઇ પટેલની સાક્ષીમાં સહિ કરાવી ધમિષ્ઠાબેન અને તેમની મમ્મીનો મિલકતમાં કોઇ હક હિસ્સો નહી હોવાની નોંધ પડાવી હતી.આ અંગ ધમિષ્ઠાબેનના પતિ જેહુલભાઇ કહેવા જતાં તેમના ભાઇઓએ અમો કહીએ ત્યાં સહી કરી દો નહીં તો જીવતા નહીં રહો તેમ કહી ધમકી આપી હતી. આ અંગે ધર્મિષ્ઠાબેને પશ્વિમ પોલીસ મથકે ફરિયાદ નોંધાવી હતી.