બેદરકારી:વાવ પાસે આવેલ માવસરીમાં કેનાલમાં 10 ફૂટનું ગાબડું પડતાં આજુબાજુના ખેતરો જળબંબાકાર

બનાસકાંઠાના સરહદી વિસ્તારમાં કેનાલમાં ગાબડા પડવાનો સિલસિલો યથાવત છે આજે પણ વાવ પાસે આવેલ માવસરી માઇનોર કેનાલમાં 10 ફૂટનું ગાબડું પડતાં આજુબાજુના ખેતરો જળબંબાકાર થઈ ગયા હતા.

બનાસકાંઠામાં સરહદી વિસ્તારમાં ખેડૂતોને સિંચાઈ માટે પૂરતું પાણી મળી રહે તે માટે સરકાર દ્વારા કેનાલનું નિર્માણ કરવામાં આવ્યું છે, પરંતુ આ કેનાલોનું હલકી ગુણવત્તાવાળી બાંધકામ હોવાના કારણે જ્યારે જ્યારે કેનાલમાં પાણી છોડવામાં આવે છે ત્યારે કેનાલો કાગળના પત્તાની જેમ તૂટી જાય છે. આજે વાવ ના માવસરી પાસે આવેલ માઈનોર કેનાલમાં પણ વહેલી સવારે પાણી છોડતાં સાથે 10 ફૂટનું ગાબડું પડ્યું હતું.

ગાબડું પડતાં જ કેનાલનું પાણી આજુબાજુના ખેતરોમાં ફરી વળતા ખેતરો જળબંબાકાર થઈ ગયા હતા એક તરફ ઉનાળાની શરૂઆત સાથે જ આ વિસ્તારમાં પાણીની તીવ્ર તંગી વર્તાય છે ત્યારે બીજી તરફ આજે કેનાલમાં ભંગાણ થતા હજારો લીટર પાણીનો વેડફાટ થયો હતો. વારંવાર જે રીતે કેનાલમાં ગાબડા પડી ગયા છે તેના કારણે ખેડૂતો પણ હવે ત્રાહિમામ પોકારી ઉઠયા છે જોકે સરકારે હજુ સુધી કેનાલોમાં પડતા ગાબડા અંગે નથી તો કોઈ તપાસ થઈ કે નથી કોઈ કાર્યવાહી. જેના કારણે આ વિસ્તારના ખેડૂતોમાં કેનાલો તૂટવા મામલે સરકાર સામે રોષ વધી રહ્યો છે.