અકસ્માત:ફતેપુરા પાસે બે બાઇક ટકરાયા,પટકાયેલા બાઈક ચાલકને વાહને કચડી નાખતાં મોત

ધાનેરાના ફતેપુરા પાસે શુક્રવારની રાત્રે બે બાઇક સામસામે ટકરાતાં અકસ્માત થવા પામ્યો હતો. જેમાં એક બાઇક સવાર નીચે પડી જતાં તેના ઉપર પાછળ આવતું વાહન ચાલી જતાં યુવક ઘટના સ્થળે મોતને ભેટ્યો હતો. જ્યારે બીજા બાઇક ચાલક પાસેથી દેશી દારૂ ભરેલ એક કટ્ટુ મળી આવ્યું હતું. સોતવાડા ગામના દિપકભાઇ હિરાભાઇ લુહાર ધાનેરા વીજ કંપનીમાં લેબર તરીકે પ્રાઇવેટમાં કામ કરતા હતા. અને તેઓ રોજીંદા ક્રમ મુજબ પોતાનું કામ પતાવીને પોતાના બાઇક નંબર જીજે-08-એકે-4587 ઉપર પોતાના ગામ તરફ જઇ રહ્યા હતા.

ત્યારે ફતેપુરા ગામ પાસે સામે આવી રહેલા બાઇક નંબર જીજે-05-એસએમ-2173 ના ચાલકએ પૂરઝડપે દિપકભાઇના બાઇકને ટક્કર મારતાં દિપકભાઇ રસ્તા ઉપર પટકાયા હતા. ત્યારે પાછળ આવતા મોટા વાહનના ટાયર નીચે આવી જતાં તેમનું ઘટના સ્થળે મોત નિપજ્યું હતું. ઘટના સ્થળે લોકોના ટોળે ટોળા ભેગા થયા હતા અને મૃતકને ધાનેરા રેફરલ હોસ્પીટલ ખાતે લાવ્યા હતા. ત્યારે બીજી તરફ અકસ્માત બાઇકની તપાસ કરતાં આ બાઇક પાસે એક પ્લાસ્ટીકનું કટ્ટુ પડ્યું હતું અને પોલીસે તેમાં જોતા દેશી દારૂની 38 થેલીઓ મળી આવી હતી. જેથી ધાનેરા પોલીસે જીજે-05-એસએમ-2173 નંબરના બાઇકના માલિક સામે અકસ્માત તેમજ દારૂનો ગુનો નોંધીને તપાસ હાથ ધરી હતી.