વિવાદ:ધાનેરામાં આજે યોજાનારા સીએમના કાર્યક્રમની પત્રિકામાંથી ધારાસભ્યનું નામ ગાયબ થઈ ગયું

ધાનેરા ખાતે આજે મુખ્યમંત્રી વિજય રૂપાણી દ્વારા 241 કરોડના ખર્ચે તાલુકાને શુદ્ધ પીવાના પાણી આપવા માટેની યોજનાનું ખાતમૂહૂર્ત કરવામાં આવનાર છે.જેની પત્રિકા કલેકટર દ્વારા છપાવવામાં આવી છે તેમાં ધારાસભ્ય નથાભાઈનું નામ કાપવામાં આવતા આક્રોશ ફેલાયો છે.કિન્નાખોરી રાખી નામ છાપવામાં આવ્યું નથી તેમ ધારાસભ્યએ જણાવ્યું હતુ.

સરકાર દ્વારા ધાનેરા ખાતે રવિવારે 241.34 કરોડના ખર્ચે બનનાર પાણીના પ્રોજેક્ટનો કાર્યક્રમ હોવાથી કલેકટર દ્વારા આમંત્રણ પત્રિકા છપાવવામાં આવી છે. જેમાં કોંગ્રેસના ધારાસભ્ય નથાભાઇ પટેલનું નામ ન લખવામાં આવતા તર્ક વિતર્ક સર્જાયા છે. પત્રિકામાં સાંસદ પરબતભાઇ પટેલ, ડીસાના ધારાસભ્ય શશિકાંન્ત પંડયા તેમજ કાંકરેજના ધારાસભ્ય કિર્તિસિહ વાઘેલાના નામો છે પરંતુ નથાભાઇ પટેલનું નામ નથી. તાલુકા પ્રમુખ દિનેશ પટેલે જણાવ્યું હતું કે આ ભાજપની તાનાશાહીમાં કલેકટર પણ સામેલ હોય તેમ જોવા મળી રહ્યું છે. સરકાર તાનાશાહી ચલાવી રહી છે.