અકસ્માત:ઉન નજીક કાર ડિવાઈડર સાથે અથડાતા મહિલાનું મોત, 4ને ઇજા

નવસારીમાં હાઇવે નંબર 48 પર ઉન ગામ પાસે કારચાલકે પોતાનું વાહન પૂરઝડપે હંકારી લાવીને ડિવાઇડર સાથે અથડાવી દેતા એક મહિલાનું મોત થયું હતું. જ્યારે ચાલક સહિત 4ને ઇજા થતાં સારવાર માટે દાખલ કરાયા હતા. વિજલપોરમાં રહેતા કૈલાસ છોગા પુરોહિતે ગ્રામ્ય પોલીસ મથકે ફરિયાદ આપતા જણાવ્યું કે તેમના ગામના રાહુલભાઇ ગૌરીશંકર રાજગોર (રહે. ભટરા, તા. ધાનેરા, જિ. બનાસકાંઠા) પોતાની કાર (નં. GJ-08-Bs-8338)માં અન્ય ચાર પરિવારજનો સાથે મુંબઈ જતા હતા.

દરમિયાન સોમવારે સાંજે 5.30 વાગ્યાના અરસામાં નવસારીમાં હાઇવે નં. 48 પરથી પસાર થતા હતા ત્યારે ચાલક રાહુલ રાજગોરે કાર પૂરપાટ ઝડપે ચલાવી ઉન પાટીયા બ્રિજ પહેલા સ્ટિયરીંગ પરનો કાબુ ગુમાવી કારને રોડની સાઇડના ડિવાઇડર સાથે અથડાવી દીધી હતી. જેને પગલે કારમાં બેસેલા વીણાબેન ભરતકુમાર પુરોહિત (ગોમતીવાળ) (ઉ.વ. 22, રહે. મંડાર, તા. રેવદર, રાજસ્થાન)નું ગંભીર ઇજાને પગલે મોત નીપજ્યું હતું. જ્યારે ચાલક રાહુલ, કિર્તીભાઇ શંકરલાલ પુરોહિત, જોશનાબેન કિર્તીભાઇ પુરોહિત અને નવીન કિર્તીભાઇ પુરોહિત (ઉ.વ. 5, તમામ રહે. સોરડા, તા. રેવદર, જિ. સિરોહ)ને ગંભીર ઇજા થઇ હતી. તમામને ખાનગી હોસ્પિટલમાં સારવાર અર્થે ખસેડાયા હતા. ગ્રામ્ય પોલીસે તપાસ હાથ ધરી છે.