ચૂંટણી બહિષ્કારની ચીમકી:દશેરા ટેકરીમાં રેલરાહત કોલોનીમાં 1 વર્ષથી પાણીની બુમરાણ

નવસારીમાં દશેરાટેકરીના રેલરાહત કોલોનીમાં આંગણવાડીના પાછળના ભાગે આવેલા 15થી વધુ ઘરોમાં એક વર્ષથી પાણી ન આવવા બાબતે વારંવાર રજૂઆત કરવા છતાં કોઈ નિરાકરણ ન આવતા ચૂંટણીમાં મતદાનનો બહિષ્કાર કરવાની ચીમકી આપી હતી.નવસારીના વોર્ડ નંબર-13માં દશેરાટેકરી વિસ્તારમાં આંગણવાડી આવેલી છે. આંગણવાડીની પાછળ 15થી વધુ ઘરો આવેલા છે.

આ ઘરોમાં કાલીયાવાડીની પાણીની ટાંકીમાંથી પાણી આવે છે પરંતુ આ ઘરોમાં એક વર્ષથી પાણી આવતું નથી. તેમનો વિસ્તાર નવસારી-વિજલપોર નગરપાલિકામાં આવતો હોય તેમણે આ બાબતે નગરપાલિકામાં વારંવાર રજૂઆત કરી હતી. આમ છતાં પણ સમસ્યાનું નિરાકરણ ન થતા આખરે ચૂંટણી આવતા આ વિસ્તારનાં લોકોએ ચૂંટણીમાં મતદાનનો બહિષ્કાર કરવાની ચીમકી ઉચ્ચારી હતી.

સમસ્યાનો હલ ન આવતા કાર્યવાહી
છેલ્લા એક વર્ષથી અમારા વિસ્તારમાં પાણીનો બોર નગરપાલિકા દ્વારા કરી આપવામાં આવ્યો છે. આ બોરની પાછળ જ અમારો વિસ્તાર આવેલો છે. જ્યાં પાણી કાલીયાવાડી વિસ્તારની પાણીની ટાંકીમાંથી આવતું હતું પણ એક વર્ષથી પાણી જ ન આવતા આ બાબતે વારંવાર રજૂઆત કરી પણ કોઈ હલ ન આવતા અમારા વિસ્તારનાં 15થી વધુ ઘરોએ ચૂંટણીનો બહિષ્કાર કરવાનું મન બનાવ્યું છે. > ભાવેશ પરમાર, સામાજિક અગ્રણી, સ્થાનિક