• Gujarati News
  • Local
  • Gujarat
  • Navsari
  • Water Boom In The Hilly Villages Of Vansada As Soon As Summer Starts, It Is The Turn Of People To Fetch Contaminated Water From Drains

જળની ઝંખના ક્યારે પૂર્ણ થશે?:વાંસદાના ડુંગરાળ વિસ્તારનાં ગામોમાં ઉનાળો શરૂ થતાં જ પાણીની બુમરાણ, લોકોનો નાળાંમાંથી દૂષિત પાણી ભરી લાવવાનો વારો

નવસારીએક મહિનો પહેલાલેખક: હિતેષ સોનવણે
  • ચોરવણ, કણધા, માનકુનિયા, ખાનપુર, મોળા આંબા, ખાટા આંબા જેવાં ગામોમાં પાણી માટે વલખાં
  • દૂરના ખાડાઓમાંથી પાણી લાવી ઘરે ખાડા ખોદી પ્લાસ્ટિક પાથરીને સંગ્રહ કરીએ છીએ - સ્થાનિક
  • જો પાણીની કોઈ ફરિયાદ આવશે તો તાત્કાલિક વિઝિટ કરી સમાધાન લાવીશું - પાણીપુરવઠા અધિકારી

ઉનાળો પર્વતીય વિસ્તારમાં રહેતા લોકો માટે કપરો સાબિત થાય છે. અહીં પથરાળ વિસ્તાર હોવાથી 500 ફૂટે પણ પાણી નથી મળતું, જેથી ઉનાળામાં નદી, નાળાં સુકાઈ જવાને કારણે બોર પણ ખાલીખમ થઇ જતા હોય છે. એવા સમયે નવસારીના વાંસદા તાલુકાનાં સરહદી ગામોમાં પાણીની વિકટ સમસ્યા ઉદભવે છે. મહિલાઓ જંગલ વિસ્તારમાં જઈ જીવના જોખમે નદી કે નાળામાંથી કે ખાડા ખોદીને જેમ તેમ કરીને દૂષિત પાણી મેળવે છે, જેને પગલે તેમના આરોગ્ય સામે પણ ઝોખમ ઊભું થયું છે.

નદી, નાળાં કે કોતરમાંથી પાણી લાવવાની મજબૂરી
નવસારી જિલ્લાના આદિવાસી પટ્ટાના ખેરગામ, ચીખલી અને વાંસદા તાલુકાના ઘણા ડુંગરાળ વિસ્તારમાં ઉનાળો શરૂ થતાં જ પાણીનો પોકાર ઊઠતો હોય છે. ખાસ કરીને વાંસદા તાલુકાનાં સરહદે આવેલાં ચોરવણ, કણધા, માનકુનિયા, ખાનપુર, મોળા આંબા, ખાટા આંબા જેવાં ગામોમાં પાણીના બોર કરવામાં આવે છે, પણ ઉનાળામાં પાણી સુકાતાં 600 ફૂટેથી પણ પાણી મળતું નથી, જેથી ગામની મહિલાઓ સવાર-સાંજ ભેગી થઈ જંગલ વિસ્તારમાં આવેલાં નદી, નાળાં કે કોતરમાંથી પાણી લાવવા મજબૂર બને છે.

દૂષિત પાણી ગરમ કર્યા બાદ જ પીવું પડે છે
દોઢ-બે કિલોમીટર જંગલમાં ગયા બાદ નદીના પટમાં ખાડો ખોદીને દૂષિત પાણીને વાટકે વાટકે ભરી લાવવા મજબૂર બન્યા છે, જેને ગરમ કર્યા બાદ જ પીવું પડે છે. સરકારને વારંવારની રજૂઆતો બાદ પણ વાંસદાના ડુંગરાળ પ્રદેશનાં ગામડાંમાં પાણીની યોગ્ય વ્યવસ્થા ન થતાં ગ્રામજનો ભરઉનાળે પાણી માટે વલખાં મારી રહ્યાં છે, જેથી સરકાર ફળિયામાં બોર અને ટાંકી આપી પાણી સમસ્યાનું નિવારણ લાવે એવી માગણી ઊઠવા પામી છે.

પશુપાલન કરતાં ગ્રામજનોની હાલત કફોડી
ઉનાળામાં વાંસદા અને ખેરગામનાં ઘણાં ગામડાંમાં પાણીની સમસ્યા લોકો માટે મુશ્કેલી લઇને આવે છે. લોકોને પીવાનું પાણી મેળવવા એકથી બે કિલોમીટર દૂર જઇ ત્યાં ખાડો ખોદીને એમાંથી દૂષિત પાણી ભરવું પડે છે. ત્યારે પશુપાલન કરતાં ગ્રામજનોની કફોડી હાલત થઇ જાય છે. વાંસદાના ધારાસભ્ય અનંત પટેલ પણ પાણીના બોર ઉનાળામાં ફેલ જતા હોવાની વાત સ્વીકારી રહ્યા છે તેમજ વાંસદાનાં સરહદી ગામડાંમાં પાણીની સમસ્યા મુદ્દે સરકારમાં વારંવારની રજૂઆતો બાદ પણ યોગ્ય યોજના બનાવવામાં નથી આવતી. એને કારણે પાણીની સમસ્યા આદિવાસી ગ્રામીણોએ વેઠવી પડી રહી હોવાની લાચારી તેમણે દર્શાવી હતી અને આવા વિસ્તારોમાં ઊંડા બોર બનાવવાની જરૂર છે એમ જણાવ્યું હતું.

જે પશુપાલન કરતા હોય એવાં ગ્રામજનોની હાલત કફોડી થઈ જાય છે.
જે પશુપાલન કરતા હોય એવાં ગ્રામજનોની હાલત કફોડી થઈ જાય છે.

આટલા મત આપ્યા છતાં કોઈ જોવા સુધ્ધાં આવતું નથી - સ્થાનિક
પાણીની સમસ્યા અંગે કણધાના રહેવાસી મીરાબેને જણાવ્યું હતું કે અહીં આગળ સરકાર દ્વારા પાણીની કોઈ પ્રકારની સુવિધા કરવામાં આવી નથી. દૂર દૂર ખાડાઓમાંથી પાણી લાવીને ઘરે ખાડા ખોદીને પ્લાસ્ટિક પાથરીને અમે સંગ્રહ કરીએ છીએ. નેતાઓને આટલા મત આપ્યા હોવા છતાં પણ કોઈ જોવા સુધ્ધાં આવતું નથી. અહીંથી પાણીનું ઝરણું બે-ત્રણ કિલોમીટર દૂર છે. અમે જંગલોમાં તેમજ પથરાળ વિસ્તારોમાં જઈને પાણી ભરી લાવવા મજબૂર છીએ.

ખાડો ખોદી પ્લાસ્ટિક પાથરી એમાં પાણી ભરીએ છીએ - સ્થાનિક
સ્થાનિક જિતુભાઈએ જણાવ્યું હતું કે અહીં પાણીની ખૂબ સમસ્યા છે અને અને ખૂબ દૂરથી પાણી લાવીએ છીએ. અહીંથી એક-બે કિમી દૂરથી પાણી લાવવું પડે છે, એ પણ ખરાબ હોય છે. અમારી ઘરની સ્ત્રીઓ એકલી જતી ન હોવાથી તેઓ બાળકો અને અન્ય ઘણી સ્ત્રીઓની સાથે જાય છે, જેથી સરકારને બોરિંગ અને પાણીની ટાંકી કરી આપવાની અમારી વિનંતી છે. પાણીનો સંગ્રહ ખાડો ખોદીને એમાં પ્લાસ્ટિક પાથરી એમાં પાણી ભરીએ છીએ. પછી એમાંથી નાહવા-પીવાનું પણ પાણી એમાંથી વાપરવું પડે છે, જે 15 20 દિવસ ચાલે છે.

ખાડો ખોદી એમાં પ્લાસ્ટિક પાથરી પાણીનો સંગ્રહ કરવાની મજબૂરી.
ખાડો ખોદી એમાં પ્લાસ્ટિક પાથરી પાણીનો સંગ્રહ કરવાની મજબૂરી.

નદીએ પણ અમને ખૂબ ડર લાગે : સ્થાનિક
આ અંગે મોળા આંબાનાં રહેવાસી અમિતાબેન ચૌધરીએ જણાવ્યું હતું કે અમારે પાણી ઘણું દૂરથી લાવવું પડે છે. બે-ત્રણ કલાક દૂર નદી છે, ત્યાં જવું પડે છે. ત્યાં ઝાડીઓમાંથી જવું પડે છે, જ્યાં જંગલી પ્રાણીઓનો પણ ભય રહેલો છે, જેથી પાણી લાવવા 20-25 બહેનો સાથે મળીને જાય છે. અમને બોર આપેલા, પણ એમાંથી હવે પાણી નથી મળતું, એટલે અમે નદીએ જઈએ છીએ. નદીએ પણ અમને પ્રાણીઓનો ખૂબ ડર લાગે એટલે ત્યાંથી પાણી કાઢી ઘરે લાવી ઘરે જ કપડાં ધોઈએ છીએ. સરકાર પાસે માત્ર એક બોરની અને પાણીની ટાંકીની માગ છે.

મહિલાઓને ઝાડીઓમાંથી જવું પડે છે, જ્યાં જંગલી પ્રાણીઓનો પણ ભય
મહિલાઓને ઝાડીઓમાંથી જવું પડે છે, જ્યાં જંગલી પ્રાણીઓનો પણ ભય

જો સમસ્યા હશે તો તાત્કાલિક સમાધાન લાવીશું - પાણીપુરવઠા અધિકારી
આ અંગે વાંસદા પાણીપુરવઠા વિભાગના ડેપ્યુટી ઇન્ચાર્જ શિલ્પા રાજે જણાવ્યું હતું કે હાલમાં ઉનાળો શરૂ થતાં પહેલાં જ પાણીપુરવઠા વિભાગ દ્વારા બોર્ડર વિલેજ તથા આજુબાજુનાં ગામોમાં બોર તથા કૂવા દ્વારા પમ્પિંગ મશીન વડે પાણીપુરવઠો ચાલુ કરવામાં આવ્યો છે, જ્યાં અમુક ગામો પ્રગતિ હેઠળ છે અને અમુક ગામોમાં કામો પૂર્ણ થઈ ગયેલાં છે. બોર અને પમ્પિંગ મશીનને કૂવામાં ઉતારી પાણીપુરવઠો ચાલુ કરવામાં આવ્યો છે. હમણાં બોરના પાણી સુકાઈ ગયા હોય કે પાણીની બુમરાણ ઊઠી હોય એવી કોઈ ફરિયાદ આવી નથી અને જો એવી કોઈ ફરિયાદ આવશે તો અમે તાત્કાલિક વિઝિટ કરી જે કોઈ સમસ્યા હોય એનું સમાધાન લાવી પાણીપુરવઠો ચાલુ કરી દઈશું.

આવા ખાડાઓ બનાવી પાણીનો સંગ્રહ કરે છે
આવા ખાડાઓ બનાવી પાણીનો સંગ્રહ કરે છે

બદલાતા વાતાવરણને કારણે પડી રહેલી કાળઝાળ ગરમીએ વાંસદાના ગ્રામીણોને પાણી માટે તરસ્યા કર્યા છે, ત્યારે ગુજરાતની વિકાસશીલ અને સંવેદનશીલ સરકાર આદિવાસીઓને પીવાનું શુદ્ધ પાણી ઉનાળામાં ઘરના નળમાં પાણી મળતું થાય એવી કોઈ યોજના બનાવે એ જ સમયની માગ છે.

અન્ય સમાચારો પણ છે...