મુશ્કેલી:રવિવારી હાટબજારમાં આડેધડ પાર્કિંગથી ટ્રાફિક, સ્થાનિકો ત્રસ્ત

નવસારીનાં રીંગરોડ પર ભરાતા હાટ બજારમાં પાર્કિંગની વ્યવસ્થા હોવા છતાં કેટલાક લોકો રસ્તા પર વેપાર કરતા હોય ટ્રાફિકમાં ભારણરૂપ બને છે. તેમને યોગ્ય જગ્યા આપવા સ્થાનિકોએ ટાઉન પોલીસને લેખિતમાં રજૂઆત કરી હતી.નવસારીના રીંગરોડ પર આવેલા એક ખાનગી પ્લોટમાં રવિવારી હાટ બજાર ભરાય છે. આ હાટ બજારનું ઉન્નતિ ટ્રસ્ટ, નવસારીનાં રાહબર હેઠળ સંચાલન કરાઈ રહ્યું છે.

હાટ બજારના સંચાલકોએ ટ્રાફિક માટે અલગ જગ્યા ફાળવી છે અને ભાડું પણ મિનિમમ લેવામાં આવે છે પણ કેટલાક વેપારીઓ ભાડુ હાટ બજાર સંચાલન કરતા હાટ ટ્રસ્ટને આપવું ન પડે તે માટે રસ્તા પર ટ્રાફિકને અડચણરૂપ થાય તે રીતે રીંગરોડના ડિવાઈડર પર ધંધો લગાવતા હોય છે, તેના કારણે ટ્રાફિક સમસ્યા ઉભી થાય છે. જેને પગલે સ્થાનિકોને આવાગમનમાં તકલીફ પડતી હોય છે. આ બાબતે ટાઉન પોલીસના અધિકારીને યોગ્ય વ્યવસ્થા કરી ટ્રાફિકનું ભારણ અટકે અને સ્થાનિકોને તકલીફ ન પડે તે માટે લેખિત રજૂઆત કરી હતી.

વેપારીઓ ન માનતા રજૂઆત કરવી પડી
કોઈ પણ વેપારીને ધંધો કરવાની છૂટ છે પણ અમુક વેપારીઓ પોતાનું ભાડું બચાવવા રસ્તા પર વેપાર કરી ટ્રાફિકને અડચણરૂપ થાય તેવું કાર્ય કરતા આવ્યા છે. તેમને સમજાવાવ છતાં પણ તેઓ ન માનતા અંતે પોલીસને રજૂઆત કરી છે. - ઈમરાનભાઈ શેખ, સ્થાનિક, રીંગરોડ, નવસારી