સ્થાનિક સ્વરાજ્યની ચૂંટણી:ભાજપના ટોચના નેતાઓ ટિકિટની રેસમાંથી બહાર

નવસારી-વિજલપોર પાલિકાની આગામી ચૂંટણીમાં 60 વર્ષની ઉપરની વયના અને ત્રણ ટર્મ ચૂંટાયેલાને ભાજપે ટિકિટ ન આપવાના નિર્ણયથી પક્ષના ટોચના નેતાઓની બાદબાકી થશે. સ્થાનિક સ્વરાજ્યની ચૂંટણીમાં 60 વર્ષથી વધુ વયના અને ત્રણ ટર્મ ચૂંટાયેલાને પક્ષની ટિકિટ ન આપવાનો ભાજપે નિર્ણય લીધો છે.

આ નિર્ણયની અસર અહીંની નવસારી વિજલપોર નગરપાલિકાની આગામી ચૂંટણીમાં પક્ષમાં ટિકિટ માટે દાવેદારી કરનારા અનેક ધુરંધરો ઉપર થશે.પૂર્વ પાલિકા પ્રમુખ અને બે દાયકાથી ચૂંટાતા આવેલ પ્રેમચંદ લાલવાણી એ તો આગામી ચૂંટણી માટે પક્ષમાંથી દાવેદારી ખેંચી લીધી છે.આ ઉપરાંત પણ પક્ષના ટોચના સિનિયર સિટીઝનો પર અસર થશે. અહીં ઉલ્લેખનીય છે કે પક્ષના એક અગ્રણી મધુભાઈ કથીરિયાએ પણ આ વખતે વોર્ડ નં- 2 માટે દાવેદારી કરી છે,જેઓની વય 60 વર્ષ પુરા થવામાં 5 મહિના બાકી હોય ટિકિટની રેસમાં હજુ રહી શક્યા છે.જોકે આવા નસીબદાર ખૂબ ઓછા છે.

ભાજપ-કોંગ્રેસ બન્નેની પસંદ યુવા બ્રિગેડ
ભાજપના આ અગ્રણી મને-કમને નિવૃત્ત થશે !
પ્રેમચંદ લાલવાણી, રમેશ હીરાણી, ત્રિભોવન ચાવડા, હિંમતભાઈ પટેલ, ધીરુભાઈ ગેવરિયા, નીતિન કંસારા, સુરેશ શેઠ, શિલાબેન દેસાઈ વગેરે.

કોંગ્રેસમાં પણ મોટાભાગના ઉમેદવાર અંડર-60
જ્યાં ભાજપમાં 60ની મર્યાદા પક્ષે મુકતા આ વયની ઉપરનાંને ટિકિટ મળશે નહીં ત્યાં પ્રતિસ્પર્ધી કોંગ્રેસે આવી મર્યાદા મૂકી નથી પણ ટિકિટ માગનારા મહત્તમ 60ના જ હોવાનું જાણવા મળ્યું છે. નવસારી શહેર કોંગ્રેસ પ્રમુખ નીરવ નાયકે જણાવ્યું કે કોંગ્રેસમા ટિકિટ માગનારા મહત્તમ 50થી ઓછી વયના છે.60થી વધુ વયના તો માંડ બે જણા જ છે.