આયોજન:આજે કૃષિ યુનિવર્સિટી સેન્દ્રિય કૃષક બજારનો પ્રારંભ કરશે

નવસારી કૃષિ યુનિવર્સિટીમાં સજીવ ખેતી અંતર્ગત ડેવલપમેન્ટ ડેમોસ્ટ્રેશન એન્ડ અવરનેસ પ્રોગ્રામ ઓફ ઓર્ગેનિક ફાર્મિગ ઇન સાઉથ ગુજરાત પ્રોજેકટ ચાલી રહ્યો છે. આ પ્રોજેકટ અંતર્ગત રાજયમાં સજીવ ખેતીનો વ્યાપ વધે તેમજ વધારે ખેડૂતો સજીવ ખેતીમાં જોડાઇ અને સજીવ ખેતી કરતા ખેડૂતોને ખેતરમાં ઉત્પન્ન થયેલા ખેતપેદાશો, શાકભાજીને યોગ્ય પોષણક્ષમ ભાવ, બજાર મળી રહે તે હેતુથી નવસારી જિલ્લાના સેન્દ્રિય ખેતી કરતાં ખેડૂતોના ઉત્પાદનનું સીધુ વેચાણ કરવા માટે નવસારી કૃષિ યુનિવર્સિટી, દાંડી રોડ, વિજલપોર, નવસારી પાલિકાની જગ્યા પર અઠવાડિયામાં એક દિવસ એટલે કે દર બુધવારે સેન્દ્રિય કૃષક બજારનું આયોજન હાથ ધરાનાર છે.

જેનું ઉદઘાટન આજે 17મીને બુધવારે સવારે 9.30 કલાકે નવસારી કૃષિ યુનિવર્સિટીના કુલપતિ ડો. ઝીણાભાઇ પટેલ, ડીડીઓ પ્રશસ્તિ પારીક અને કૃષિ યુનિવર્સિટીના શિક્ષણ નિયામક ડો. સી.કે.ટીંબડીયાની ઉપસ્થિતિમાં યોજાશે તેમ નવસારી કૃષિ યુનિવર્સિટીના સૂત્રો પાસેથી માહિતી સાંપડી છે.