ધન્યવાદ મોદીજી:એક જ દિવસે રેકર્ડબ્રેક 73000થી વધુને રસી

નવસારીએક મહિનો પહેલા
  • કૉપી લિંક
વડાપ્રધાનના નરેન્દ્ર મોદીના જન્મદિવસે મેગા રસીકરણનું આયોજન કરાયું હતું. - Divya Bhaskar
વડાપ્રધાનના નરેન્દ્ર મોદીના જન્મદિવસે મેગા રસીકરણનું આયોજન કરાયું હતું.
  • વેક્સિનેશનના મેગા ડ્રાઇવ મોડી રાત સુધી પણ શરૂ રહ્યું, રસીકરણ માટે આરોગ્ય સહિતના સરકારી સ્ટાફની પણ દોડધામ
  • વડાપ્રધાનના જન્મદિને નવસારી જિલ્લામાં 650 જગ્યાએ રસીકરણ, એક જ દિવસે 26થી વધુ ગામોની 100 ટકા રસીકરણની સિદ્ધિ

નવસારી જિલ્લામાં વડાપ્રધાન મોદીના જન્મદિને એક જ દિવસે રાત્રે 9 સુધીમાં રેકર્ડબ્રેક 69000 લોકોને રસી અપાઈ હતી, તો એક જ દિવસે 26થી વધુ ગામોએ 100 ટકા રસીકરણની પણ સિદ્ધિ હાંસલ કરી લીધી હતી. 16 જાન્યુઆરીથી શરૂ થયેલ રસીકરણમાં 16 સપ્ટેમ્બર સુધીમાં એક દિવસે સૌથી વધુ 20 હજાર જેટલા લોકોને રસી અપાઈ હતી. જોકે 17 સપ્ટેમ્બરે વડાપ્રધાન નરેન્દ્ર મોદીનો જન્મદિન હોય તે દિવસે રેકર્ડબ્રેક સંખ્યામાં રસીકરણ કરવાનો નિર્ધાર કરાયો હતો.

જેને પહોંચી વળવા 17મીએ વહેલી સવારથી જ 650 જગ્યાએ રસી આપવાની શરૂઆત થઈ હતી. આ મેગા રસીકરણ ડ્રાઇવ આખો દિવસ તો ચાલ્યું પણ રાત્રે પણ જારી રહ્યું હતું. જિલ્લામાં બપોરે 3 વાગ્યા સુધીમાં જ અંદાજે 38 હજાર લોકોને રસી આપી દેવાઈ હતી.જે આંક રાત્રે 9 સુધીમાં 69000 થઈ ગયો હતો. બીજું કે વધુ રસીકરણના કારણે જિલ્લાના 26થી વધુ ગામોએ એક જ દિવસે 100 ટકા રસીકરણની સિદ્ધિ હાંસલ કરી લીધી હતી. અહીં ઉલ્લેખનીય છે કે વધુ રસીકરણ કરવા માટે આરોગ્ય વિભાગનો સ્ટાફ ઉપરાંત જિલ્લાનો ઘણો અન્ય સરકારી સ્ટાફ પણ કામગીરીમાં જોતરાયો હતો.

ઘરે ઘરે સરકારી કર્મીને દોડાવાયા
વધુ સંખ્યામાં રસીકરણ થાય તે માટે તંત્રએ ઓનલાઈન ઉપરાંત ઓફલાઈન પણ રસીકરણ કર્યું હતું. બીજુ કે લાભાર્થીઓને રસીકરણ માટે ફોન તો કર્યા હતા. સાથે ઘરે ઘરે સરકારીકર્મીઓને દોડાવી બાકી લાભાર્થીઓને કોવિડ રસી લેવા જણાવાયું હતું, જેની અસર પણ થઈ હતી.

વધુ ‘કોવીશીલ્ડ’ રસી અપાઇ
મેગા રસીકરણ ડ્રાઈવમાં કોવીશીલ્ડ અને કોવેક્ષીન બંને કંપનીની રસી મુકવામાં આવી હતી. જોકે વધુ સંખ્યામાં કોવીશીલ્ડ જ રસી મુકાઈ હતી.

ટાર્ગેટ કરતાં વધુ ડોઝ આવતા ગયા
કુલ રસીકરણનો ટાર્ગેટ મોદીના જન્મદિનનો નવસારી જિલ્લાનો ગુરૂવારે 70 હજારનો રખાયો હતો અને તે મુજબ રસીના ડોઝ પણ ફાળવાયા હતા પરંતુ ટાર્ગેટ શુક્રવારે વધતો જ ગયો હતો અને વધુ સંખ્યામાં ડોઝ પણ આવતા ગયા હોવાનું જાણવા મળે છે.

અત્યાર સુધીની રોજની સરેરાશ કરતાં 15 ગણી રસી અપાઇ
જિલ્લામાં રસીકરણ શરૂ થયાને 8 મહિના પૂરા થયા છે. લગભગ 245 જેટલા દિવસો થયા છે. આ દિવસો દરમિયાન પહેલો અને બીજો ડોઝ મળી કુલ 11.75 લાખ ડોઝ આપવામાં આવ્યા છે. આમ 8 મહિના દરમિયાન રોજનું 4800 રસીકરણ થયું છે. જે સરેરાશ કરતાં અંદાજે 15 ગણુ રસીકરણ મોદીના જન્મદિને એક જ દિવસે કરવામાં આવ્યું હતું.

અન્ય સરકારી કામગીરી અસરગ્રસ્ત
રસીકરણના મેગા ડ્રાઈવમાં આરોગ્ય વિભાગ ઉપરાંત મામલતદાર કચેરી, પંચાયત વગેરેનો અન્ય ઘણો સ્ટાફને કામે લગાડાયો હતો. જેને લઈને શુક્રવારે અનેક સરકારી કચેરીઓમાં કર્મચારીઓ જણાતા ન હતા. જેની અસર કર્મચારીઓની રૂટિન સરકારી કામગીરી ઉપર પડી હતી.

અન્ય સમાચારો પણ છે...