શીખ:સાબિતી અને ખુલાસો એ સંબંધોનું કેન્સર છે : પંન્યાસ પદ્મદર્શન મહારાજ

નવસારી સ્થિત આદિનાથ જૈન સંધમાં પૂ. પંન્યાસ પદ્મદર્શનજી મહારાજે સત્સંગ સંસદમાં જણાવ્યું હતું કે, સાબિતી અને ખુલાસોએ સંબંધોનું કેન્સર છે. જીવનના મહાસાગરમાં અનેકવાર ભરતી અને ઓટ આવ્યા કરે છે. ભરતીના સમયે ખૂબ હરખાઇ જવાની જરૂર નથી અને ઓટના સમયે હાંફળા ફાંફળા થવાની જરાય જરૂર નથી. સંબંધોના ક્ષેત્રે પણ આવું જ છે. જેની સામે તમે સંબંધો બાંધો છો એમાં ક્યાંક સમસ્યાઓ ઉભી થવાની છે. સમસ્યા વખતે શાંત રહો. અશાંત અવસ્થામાં તમે તમારી સ્વસ્થતા ગુમાવી બેસો છો.

મન વિચારોના ચકડોળે ચડીને ઇધર-ઉધર થઇ જાય છે. સંબંધોની મીઠાસને જાળવી રાખો. એમાં જરાક પણ કડવાશ આવતાં સ્વસ્થ મનને ડિસ્ટર્બ કરતા નહીં. મન ડિસ્ટર્બ થતા એની અસર જીવનના તમામ સ્તર ઉપર પડશે. પરિવાર કૂુટુંબ, સમાજ અને રાજકારણના ક્ષેત્રે ઘણીવાર સબંધોની દિવાલ ધ્વસ્ત થતાં દોસ્ત પણ દુશ્મન બની જતા હોય છે. સંબંધોની દિવાલને મજબૂત કરવા સમજરૂપી સિમેન્ટનો ઉપયોગ કરવો જોઇએ. ઘણીવાર ગેરસમજોના કારણે સંબંધોના ટૂકડે-ટૂકડા થઇ જતાં હોય છે. સાબિતીઓ માંગવાનું અને ખુલાસા કરવાનું બંધ કરો. સહજ રીતે જીવન શીખો.