ધ્વનિ પ્રદૂષણ:કાનના પડદા ફાડી નાખે તેવો અવાજ કરતા બુલેટ બાઈકો સામે નવસારી પોલીસની લાલ આંખ, 70 જેટલા બુલેટ ડિટેન કર્યા

નવસારી જિલ્લામાં ધ્વનિ પ્રદૂષણ કરતા બુલેટ ચાલકો સામે પોલીસે લાલ આંખ કરી છે. બુલેટમાં સાઇલેન્સર સાથે ચેડા કરવામાં આવે છે અને તેના કારણે વધારે અવાજ નીકળે છે, જેને લઇને અનેક ફરિયાદો આવતા ટ્રાફિક વિભાગે કાર્યવાહી હાથ ધરી હતી અને 70 જેટલા બુલેટ ડિટેઇન કર્યા હતા તેમજ 5 હજારનો દંડ પણ ફટકાર્યો હતો. પોલીસે 70 જેટલા વાહનો જપ્ત કર્યાઆ તમામ ફરિયાદોના પગલે જિલ્લા ટ્રાફિક વિભાગે આ મામલે એક્ટિવ થઈને આવા મોડિફાઈડ વાહનો સામે લાલ આંખ કરી, આગળ કામગીરી હાથ ધરી દીધી હતી. પોલીસે સમગ્ર જિલ્લામાં કેટલાક ડેસિબલથી વધારે ધ્વનિ ઉત્પન્ન કરતા 70 વાહનોને જપ્ત કરી લીધા હતા. તેની સાથો સાથ પોલીસે આ તમામ બાઈકોને ડિટેઇન કરીને RTOનો મેમો આપી 5 હજારનો દંડ પણ ફટકાર્યો હતો.

સાઈલેન્સર સાથે ચેડા કરી ઘોંઘાટ કરાય છેયુવાનોથી લઇને તમામ લોકોમાં વર્ષો પહેલાથી બુલેટ બાઇકનો ટ્રેન્ડ જોવા મળી રહ્યો છે. ત્યારે અત્યારે કેટલાક લોકો અલગ થ્રિલ મેળવવા માટે બુલેટના સાઇલેન્સરમાં ચેડા કરતા રહેતા હોય છે, જેના કારણે તેમના બુલેટમાંથી સામાન્ય બાઇક કરતા વધારે અવાજ નિકળતો હોય છે. આવા કૃત્યને કારણે જાહેરમાર્ગો પર ધ્વનિ પ્રદુષણ પણ ફેલાય છે અને લોકો પરેશાન પણ થતા રહે છે. આ મામલે નવસારીના જિલ્લા પોલીસ વડાને અનેક ફરિયાદ રૂપી અરજીઓ આવી હતી. જેમાં એવો ઉલ્લેખ કરવામાં આવ્યો હતો કે, આવા વાહનોને શાળા અને હોસ્પિટલો પાસેથી પસાર થવા પર પ્રતિબંધ મુકી દેવો જોઈએ.