ધારણા પ્રદર્શન પર રોક:નવસારી અધિક કલેકટરએ જાહેરનામુ પ્રસિદ્ધ કર્યું ,સરકારી કચેરીઓના 200 મીટરની હદમાં જાહેરમાં ધરણા કરવા પર પ્રતિબંધ

નવસારી જિલ્લામાં જાહેર સુલેહશાંતિ અને સલામતિને હાનિ ન પહોચે અને લોકોમાં સંવાદિતા જળવાય તે હેતુસર નવસારી અધિક જિલ્લા મેજીસ્ટ્રેટ કેતન પી.જોષીએ એક જાહેરનામુ પ્રસિદ્ધ કર્યું છે.જિલ્લાની તમામ પ્રાંત કચેરીઓ તથા નવસારી જિલ્લા પંચાયત, પોલીસ અધિક્ષકશ્રી નવસારી કચેરી તથા પોલીસ સ્ટેશનના કંપાઉન્ડ તથા તાલુકા ખાતે આવેલી તાલુકા મામલતદાર કચેરી, તાલુકા વિકાસ અધિકારી કચેરી, પોલીસ સ્ટેશનના કંપાઉન્ડ તેમજ કંપાઉન્ડ બહારની 200 મીટરની ત્રિજયાના હદ વિસ્તારમાં પ્રતિક ઉપવાસ, આમરણાંત ઉપવાસ અને ધરણા/ભુખ હડતાલ ઉપર બેસવા કે ચાર કરતા વધુ માણસો ભેગા થવા સભા/સરઘસ કરવા પર તાત્કાલિક અસરથી તા.17મી માર્ચ સુધી પ્રતિબંધ ફરમાવ્યો છે. આ હુકમનો ભંગ કરનાર કે ઉલ્લંઘન કરનાર સજાને પાત્ર થશે.

ગુજરાત રાજયમાં ઠેર ઠેર ગેરકાયદેસર મંડળી રચી ધરણા/ઉપવાસ પર બિનપરવાનગીથી બેસવાની દુર્ઘટનાઓ વારંવાર બનવા પામી છે. નવસારી જિલ્લામાં પણ નાગરિકો પોતાની માંગણી, રજૂઆત તરફ ધ્યાન ખેચવા માટે અથવા તો ચોકકસ ઇરાદાથી જિલ્લા સેવા સદનના પ્રાંગણ અને પ્રાંગણને અડીને પસાર થતા સંકળાયેલ મુખ્ય રોડ ઉપર પ્રતિક ઉપવાસ, આમરણાંત ઉપવાસ અને ભુખ હડતાલનું ઓચિંતુ અને મનસ્વી આયોજન કરી કચેરીમાં તેમજ જાહેરમાર્ગો પર બાધા સર્જે છે. જેના પરિણામે કચેરીમાં આવતા અરજદારો અને સામાન્ય જનતા માટે દુવિધા સર્જાય છે.

ભૂતકાળમાં જિલ્લા કલેકટર કચેરીમાં આવેદન આપવા આવતા અરજદારો સાથે પોલીસ નું ઘર્ષણ થાય છે અને અરજદારોને મોટેભાગે મોટી સંખ્યામાં કલેક્ટરને જાતે મળવા જવાનું આગ્રહ રાખવામાં આવે છે ત્યારે આવો કોઈ પણ પ્રકારનો ટકરાવ સ્થાનિક પોલીસ કે અધિકારીઓ વચ્ચે ન થાય તે માટે જિલ્લા અધિક કલેક્ટર એ જાહેરનામું પ્રસિદ્ધ કરીને સરકારી ઓફિસની 200 મીટર ની ત્રિજ્યામાં ધારણા પ્રદર્શન કરવા પર રોક લગાવી છે.