રજુઆત:રામલામોરામાં દારૂનો વેપલો બંધ કરાવવા આવેદન અપાયું

નવસારીને અડીને આવેલા રામલામોરા ગામે દેશી અને વિદેશી દારૂનું ખુલ્લેઆમ વેચાણ કરી રહ્યા હોય તે બાબતે ગ્રામજનો પરેશાની વેઠી રહ્યા છે. જેથી ગ્રામજનોએ સોમવારે ગ્રામ્ય પીઆઈ અને એસપીને આવેદન આપીને રજૂઆત કરી હતી. જેમાં દેશી અને વિદેશી દારૂનુ વેચાણ સાંજનાં સમયે થાય છે. દારૂ પીવા બહારગામનાં લોકોની અવર જવર સાંજે થતી હોય છે. જેમાં દારૂ પીવાવાળા ગામની દીકરી-બહેનોની છેડતી કરી અઘટિત માંગણી કરી રહ્યા છે.

દારૂનું દુષણનાં કારણે આદિવાસી સમાજ છિન્નભિન્ન થઈ રહ્યો છે. બૂટલેગરો બેફામ બન્યા છે. રામલામોરા દેશી દારૂ અને બનાવટી તાડીનું વેચાણ કરી રહ્યા છે. આ બાબતે પોલીસ તુરંત કાર્યવાહી કરી ગ્રામજનોને નશાકારક વસ્તુઓથી બચાવે તેવી અપીલ કરી હતી.

પોલીસને અપાયેલી રામલામોરાનાં બૂટલેગરોની યાદી
આવેદનપત્રમાં બૂટલેગરનાં નામ ટીના નટુ, ઉષા વસંત, જયલી, જયંતિ ગોગો, ભરત ચીમન, રીતેશ કાળું, મુકેશ છોટુ અને બનાવટી તાડી બનાવનાર જયંતિ તાડીવાલો, પ્રકાશ નાથુભાઈ દેશી દારૂ વેચનાર અને દારૂ માટે ગોળ આપનાર બંસી મારવાડી,ભાગુ મારવાડી અને ભદ્રેશ ઘાંચી (તમામ રહે. રામલામોરા) વિરૂદ્ધ પગલા લેવા પોલીસને નામ આપ્યા હતા.