હાલાકી:ખેરગામમાં નામાંકન ભરવા માટે રેલી સ્વરૂપે નીકળતા બજારમાં ટ્રાફિકજામ

ખેરગામ તાલુકા પંચાયત તથા જિલ્લા પંચાયતની બે બેઠકો માટે થનારી ચૂંટણી માટે ભાજપ-કોંગ્રેસ દ્વારા ઉમેદવારોના નામની યાદી જાહેર થતા વિવિધ બેઠકો ઉપર ચૂંટણી લડવા આતુર ઉમેદવારોએ શુક્રવારે બપોરે પોતાના સમર્થકો અને કાર્યકરો સાથે પોતાનું ઉમેદવારી ફોર્મ ભરવાની પ્રક્રિયા હાથ ધરી હતી. નામાંકન ભરવા માટે ખેરગામ બજારમાં કોંગ્રેસની મોટેભાગના મહિલાઓ પદયાત્રા સાથે બજારમાંથી પસાર થયા હતા. જ્યારે ભાજપના કાર્યકરો મોટેભાગે ફોરવીલ વાહનોવાળી રેલી સ્વરૂપે બપોરે નીકળી હતી.

જેના પગલે બજારમાં વાહનોની સંખ્યા વધી જવાના લીધે પંદરેક મિનિટ સુધી ખેરગામ બજારમાં ટ્રાફિક જામ સર્જાતા અવરજવર અવરોધાઈ હતી. જેમાં વ્યવસ્થા જાળવવા માટે એક પણ હોમગાર્ડ-પોલીસ જવાનની અછત જોવા મળી હતી. જો કે બંને પક્ષના આગેવાનો અને કાર્યકરો શાંતિપૂર્વક વારાફરતી રેલી સ્વરૂપે પસાર થઈ સેવા સદન પહોંચી ઉમેદવારોના નામાંકન ભરવાની કામગીરી પાર પાડી હતી.