ધરપકડ:બરડીપાડામાં ધોળા દિવસે ઘરમાં ચોર ઘૂસ્યો ને પોલીસે દબોચી લીધો

રૂમલા નજીકના બરડીપાડામાં બંધ ઘરમાં ચોરી કરવા ઘુસેલા ઇસમને સ્થાનિક લોકોની જાગૃકતા તથા પોલીસની સતર્કતા અને ત્વરીત કાર્યવાહીના ટીમવર્કથી રીઢા ઘરફોડ ચોરને લાઈવ ઘરફોડ ચોરી કરતા ૨ેડહેન્ડેડ ખેરગામ પોલીસે ઝડપી પાડ્યો હતો.

બરડીપાડામાં નરેશભાઇ ગાંવિતના બંધ મકાનમાં બપોરના સમયે શંકાસ્પદ હિલચાલ થતી હોવાનું તેમની બાજુમાં રહેતા ભરતભાઇ ગાંવિતને જણાતા તેમણે ખેરગામ પીએસઆઈ જે.વી.ચાવડાને ટેલિફોનીક જાણ કરતા તેમણે તાત્કાલિક રુમલા ચોકીના હેડ કોન્સ્ટેબલ મોહનભાઇ તથા પોલીસ કોન્સ્ટેબલ મનહરભાઇ તથા પી.સી.આર ઇન્ચાર્જ એએસઆઇ સુરેશભાઇને જાણકારી આપી સ્થળ પર રવાના કરતા પોલીસ સ્ટાફ તાત્કાલિક બનાવવાળી જગ્યાએ પહોંચ્યો હતો. પોલીસે રહેણાંક ઘરની ખાત્રી કરતા ઘરનો પાછળનો દરવાજો બાકોરુ પાડી ખોલી નાખેલી હાલતમાં ખુલ્લો હોવાનું જણાય આવ્યું હતું.

પોલીસ સ્ટાફ દ્વારા ઘરમાં અંદર પ્રવેશી નીચેના માળેથી ચોર ઇસમને લાઈવ ઘરફોડ ચોરી કરતા રેડ હેન્ડેડ પકડી પાડ્યો હતો. આ દરમિયાન બીજો ચોર ઇસમ ઘરના પ્રથમ માળે હોવાથી તે ઘરના ધાબા ઉપર ચઢી ત્યાંથી નળીયાના ભાગે નીચે કૂદી ભાગી ગયો હતો. પકડાયેલ ચોર સંદિપભાઇ પટેલ (ઉ.વ. 42, હાલ રહે. સુરત, ચોર્યાસી, મૂળ રહે. આંતલીયા)એ ઘરમાંથી ચોરી કરેલા ચાંદીના સાંકળા, બે મોબાઇલ તથા એકટીવા અને રોકડ રકમ રૂ. 200 તથા લોખંડની એક મોટી પરાઇ સાથે પોલીસે અટક કરી હતી. તેની સાથેના નાસી જનાર અન્ય ઇસમને ઝડપી પાડવા પોલીસે પ્રયત્નો શરૂ કર્યા છે.

આ બનાવની તપાસ પીએસઆઇ એસ.એસ.માલ કરી રહ્યા છે.પોલીસે ચોર ઇસમની પુછપરછ કરતા તથા ગુજરાત પોલીસની FACETAGR એપ્લીકેશન તથા ઈ - ગુજકોપ એપ્લીકેશન મારફતે ખાત્રી કરતા આરોપીના બીજા પણ ગુના જણાય આવ્યા હતા.