મોતની છલાંગ:છાપરા રોડના યુવાનની નદીમાં મોતની છલાંગ, કારણ અકળ, મૃતક સુનિલ ઉર્ફે સની પરમાર અપરણિત હતો

નવસારીનાં છાપરારોડ ખાતે રહેતા યુવાને કોઈ અગમ્ય કારણસર પૂર્ણ નદીમાં મોડી સાંજે મોતનો કૂદકો મારી જીવન ટુકાવ્યું હતું. ઘટનાની જાણ થતા નવસારી ફાયર બ્રિગેડને જાણ કરતા લાશ્કરોએ ઘટના સ્થળે જઈને યુવાનનો મૃતદેહ કાઢ્યો હતો અને તેના ફોટો સોશિયલ મીડિયામાં વહેતા કરતા અડધા કલાકમાં યુવાનની ભાળ મળી હોવાની માહિતી મળી હતી. નવસારીનાં છાપરા રોડ ખાતે આવેલ પંચવટીનગર સોસાયટીમાં બીપીનભાઈ પરમાર તેમના પુત્ર સુનિલભાઈ (ઉવ.આ 26 )સાથે સુખી સંપન્ન પરિવારમાં રહે છે. સુનિલ પરમાર અપરણિત હતો અને દુબઈ ખાતે નોકરી કરવા જતો હતો પણ લોકડાઉન બાદ તે દુબઈ જઈ શક્યો ન હતો. લોકડાઉન બાદ નવસારીમાં નોકરી કરતો હતો. સુનિલ ઘણા સમયથી હતાશામાં હોવાની માહિતી મળી છે. આજે બપોરે ઘરે એકલો હતો ત્યારે નવસારીની પૂર્ણા નદીમાં મોડી સાંજના સુમારે છલાંગ લગાવી હતી.

પૂર્ણા નદીના પુલ પરથી પસાર થતા લોકોએ નવસારી ફાયર બ્રિગેડને જાણ કરી હતી અને સાંજે 7 વાગ્યાનાં સુમારે ફોન કરતા 6 જેટલા તરવૈયા લાશ્કરો સહીત ઘટનાસ્થળે આવીને પૂર્ણા નદીમાંથી યુવાનનો મૃતદેહ કાઢ્યો હતો. પોલીસને યુવાન પાસેથી કોઈ ઓળખકાર્ડ કે કોઈ દસ્તાવેજ ન મળતા મૃતદેહનો ફોટો સોશિયલ મીડિયામાં મુકતા અડધા કલાકમાં યુવાનની ઓળખ થઈ ગઇ હતી. આ યુવાન છાપરા રોડ ખાતે રહેતા સુનિલ પરમાર હોવાનું ખુલ્યું હતું. ઘટનાની વધુ તપાસ ગ્રામ્ય પોલીસનાં ઉમેશ પાડવે કરી રહ્યા છે. મોડીરાત સુધી પોલીસને સ્યુસાઇડ નોટ કે મૃત્યુનું કારણ જાણવા મળ્યું ન હોવાની વિગતો મળી રહી છે.