નિર્ણય:ચો.મી. પ્રમાણે રૂ. 900 વળતર મળ્યાં બાદ જ ખેડૂતો જમીનનો કબજો આપશે

વડોદરા-મુંબઈ એક્સપ્રેસ-વેના અસરગ્રસ્ત ખેડૂતોની ચીખલી એપીએમસીમાં બેઠક યોજાઈ હતી. આ બેઠકમાં બુલેટ ટ્રેન પ્રોજેકટની માફક પ્રતિ ચો.મી.નું રૂ. 900 મુજબ વળતર ચૂકવવામાં આવે અને તે પૂર્વે ખેડૂતોને સાથે રાખી રિ-સરવે કરવામાં આવે ત્યારબાદ જ હાઇવે ઓથોરિટીને જમીનનો કબજો સોંપવાનો મક્કમ નિર્ધાર ખેડૂતો દ્વારા વ્યક્ત કરાયો હતો.

ખેડૂતોની બેઠક વલસાડ ખેડૂત સમાજના પ્રમુખ ભગુભાઇ પટેલની અધ્યક્ષતામાં જિલ્લા ખેડૂત અગ્રણી અને એપીએમસીના ચેરેમન કિશોરભાઈ પટેલ, ગિરીશભાઈ પટેલ સહિતના આગેવાનોની ઉપસ્થિતિમાં યોજાઈ હતી. જેમાં ચીખલી સહિત જિલ્લાના ખેડૂતો મોટી સંખ્યામાં ઉપસ્થિત રહ્યા હતા. બેઠકમાં ઉપસ્થિત આગેવાનો દ્વારા ખેડૂતોને માર્ગદર્શન અપાયું હતું. વડોદરા-મુંબઈ એક્સપ્રેસ-વેમાં પણ સંપાદિત થનાર જમીનનું વળતર પ્રતિ ચો.મી રૂ. 900 મુજબ ચૂકવવા માટે સરકારે હકારાત્મક અભિગમ દાખવ્યો છે ત્યારે આ માટે જિલ્લા કલેકટર સમક્ષ લેખિત રજૂઆત ખેડૂતો દ્વારા સામૂહિક રીતે સ્થાનિક સાંસદ, ધારાસભ્યોને સાથે રાખીને કરવી પડશે. સાથે ખેડૂતોને સાથે રિ-સરવે કરવામાં આવે તે માટે પણ રજૂઆત કરવાનો નિર્ણય કરાયો હતો.

બેઠકમાં ખેડૂત આગેવાન ભગુભાઇ ઉપરાંત કિશોરભાઈ પટેલ સહિતના દ્વારા સી.આર.પાટીલ માટે વિશેષ આભારની લાગણી વ્યક્ત કરી હતી.જોકે બેઠકમાં બુલેટ ટ્રેન પ્રોજેકટની માફક પ્રતિ ચો.મી.ની રૂ. 900 મુજબ વળતર ચૂકવવામાં આવે અને તે પૂર્વે ખેડૂતોને સાથે રાખી રિ-સરવે કરવામાં આવે ત્યારબાદ જ હાઇવે ઓથોરિટીને જમીનનો કબજો સોંપવાનો મક્કમ નિર્ધાર ખેડૂતો દ્વારા વ્યક્ત કરાયો હતો.