ચૂંટણીની પૂર્વતૈયારી:જિલ્લા-તાલુકા પંચાયતની ચૂંટણીના સ્ટાફને ચીખલીમાં EVMની તાલીમ

ચીખલી કોલેજમાં તાલુકા જિલ્લા પંચાયતની ચૂંટણીના સ્ટાફને ઇવીએમના નિદર્શન સાથે તાલીમ આપવામાં આવી હતી. ચીખલીમાં વહીવટી તંત્ર દ્વારા તાલુકા જિલ્લા પંચાયતની ચૂંટણીને લઈને કવાયત હાથ ધરવામાં આવી છે. ચૂંટણી અધિકારી અને પ્રાંત અધિકારી ડી.ડી.જોગીયા, મામલતદાર પ્રિયંકાબેન પટેલ, ટીડીઓ હિરેનભાઈ ચૌહાણ સહિતના અધિકારીઓના માર્ગદર્શન હેઠળ બેઠકોનો દોર શરૂ કરી દેવામાં આવ્યો છે.

તાલુકામાં જિલ્લા પંચાયતની 8 બેઠક અને તાલુકા પંચાયતની 28 બેઠક માટેની ચૂંટણીમાં 221 જેટલા મતદાન મથકો માટે નિમણૂંક કરાયેલ પ્રિસાઈડિંગ અને પોલિંગ ઓફિસરના 520 જેટલા સ્ટાફને ચીખલીની આર્ટ્સ એન્ડ કોમર્સ કોલેજમાં તાલીમ આપવામાં આવી હતી. જેમાં ટેકનિકલ સ્ટાફ દ્વારા ઇવીએમ મશીનનું નિદર્શન કરી ઓપરેટિંગ કેવી રીતે કરવું તે સહિતની તમામ ઝીણવટભરી માહિતી આપવામાં આવી હતી. આ ઉપરાંત અન્ય કામગીરીથી પણ સ્ટાફને માહિતગાર કરાયા હતા. ચીખલી કોલેજમાં ચૂંટણીમાં ફરજ બજાવનાર કર્મચારીઓને બે દિવસ તાલીમ આપવામાં આવશે. પ્રાંત અધિકારી ડી.ડી.જોગીયાની અધ્યક્ષતામાં ચાલી રહેલ તાલીમને સફળ બનાવવા નાયબ મામલતદાર મહેશભાઈ રબારી, સુરેશભાઈ દેસાઈ સહિતનાએ જહેમત ઉઠાવી હતી.