દુર્ઘટના:ધકવાડા ગામે ડીપીમાંથી કરંટ લાગતા ભેંસનું મોત

બીલીમોરા નજીક ધકવાડા ગામે ધુરીયા ફળીયા પાસે ફેંસિંગ વગરની વીજડીપી ખુલ્લામાં આવેલી છે. જ્યાં ઢોરો ઘાસ ચારો ચરવા અવારનવાર આવતા હોય છે. મંગળવારે પશુપાલન વ્યવસાય સાથે સંકળાયેલા ભાવનાબેન હસમુખભાઈ પટેલે પોતાની ત્રણ ભેંસને નિત્યક્રમ મુજબ ચારો ચરાવવા છોડી હતી. દરમિયાન ઘર નજીક ફેંસિંગવિહોણી ખુલ્લી વીજ ડીપી પરથી કરંટ ઉતરતા ચાર વર્ષીય ભેંસ મોતને ભેટી હતી. જેની જાણ આંતલિયા વીજ કચેરીને કરતા વીજ લાઇનનું સમારકામ કરાયું હતું. પીડિત પરિવારને પશુધનનું યોગ્ય વળતર મળે એવી માંગ ઉઠી છે.