ચોરી:માતરના રધવાણજ પાસે ગામ પાસે પાર્ક કરેલ કન્ટેનરમાંથી પાંચ નંગ એસીની ચોરી થઈ

ખેડા જિલ્લાના માતર પંથકમાં પાર્ક કરેલ એક કન્ટેનરમાંથી એસીની ચોરી થઈ છે. કડીથી કલકત્તા લઈ જવાતા 100 નંગ એસી પૈકી પાંચ એસી અને એક કોમ્પ્રેસરની ચોરી થઈ છે. જેમાં અજાણ્યા શખ્સો સામે કન્ટેનર ચાલકે માતર પોલીસ મથકે ફરિયાદ નોંધાવી છે.

ગત બે એપ્રિલના રોજ મધરાત્રે માતર નજીકના સુપર હાઇવે પરથી કન્ટેનર નં. WB03C5696 પસાર થઈ રહ્યું હતું. આ કન્ટેનર ચાલક અશોક યાદવે પોતાનું વાહન રધવાણજ ગામ પાસે આવેલ ખોડીયાર ટી સ્ટોલ નજીક સાઈડમાં પાર્ક કર્યુ હતું. અને તે બાદ ચાલક વાહનમાં બે ઘડી આરામ ફરમાવવા સુઈ ગયો હતો. તે સમયે કોઈ અજાણ્યા શખ્સોએ ઉપરોક્ત કન્ટેનરની પાછળની સાઈડનું તાળું તોડી તેમાં મુકેલ પાંચ નંગ એસી અને એક કોમ્પ્રેસરની ચોરી કરી પલાયન થઈ ગયા હતા.

બીજા દિવસની વહેલી સવારે અશોકે કન્ટેનરનો દરવાજો ખુલ્લો જોઈ તપાસ કરતા ચોરી થઈ હોવાની જાણ થઈ હતી. આજ દિન સુધી શોધખોળ કરતાં તસ્કરો હાથે લાગ્યા નહોતા. તેથી આજે માતર પોલીસ મથકે આ અંગેની ફરિયાદ કન્ટેનર ચાલકે નોંધાવી છે. ફરિયાદમાં જણાવ્યા મુજબ મહેસાણા જિલ્લાના કડી ખાતેના ગોડાઉનમાંથી એસીને કલકત્તા કન્ટેનરમાં લઈ જવાતા હતા. 100 નંગ એસી આ કન્ટેનરમાં ભરી કલકત્તા ડિલીવરી કરવા જઇ રહ્યા હતા. તે સમયે રસ્તામાં ચોરીનો બનાવ બન્યો છે. ઉપરોક્ત ચોરીના પાંચ નંગ એસી અને એક કોમ્પ્રેસર મળી કુલ રૂપિયા 1 લાખ 20 હજારના મુદ્દામાલની ચોરી થઈ હોવાનું એફઆઈઆરમાં જણાવ્યું છે.