ચૂંટણી:નડિયાદ પાલિકાના ઉમેદવારના મુદ્દે કોંગ્રેસે કુલડીમાં ગોળ ભાંગશે

ખેડા જિલ્લામાં પાંચ પાલિકા અને આઠ તાલુકા પંચાયતની સામાન્ય ચૂંટણીમાં ભાજપે પોતાના ઉમેદવારો જાહેર કર્યાના બીજા દિવસે પણ કોંગ્રેસના કોઇ ઠેકાણા નથી. ખાસ કરીને નડિયાદ જેવી મહત્વની પાલિકામાં પણ કોંગ્રેસ દિશા વિહિન હોય તેમ ઉમેદવારોના નામ જાહેર કરી શકી નથી અને બારોબાર મેન્ટેડ ફાળવવાનો વ્યૂહ અપનાવ્યો છે. ખેડા જિલ્લામાં ભાજપના ઉમેદવારોએ શુક્રવારથી ફોર્મ ભરવાનું શરૂ કરી દીધું છે.

પરંતુ કોંગ્રેસ હજુ અવઢવમાં હોય તેવું જોવા મળી રહ્યું છે. નડિયાદ શહેર કોંગ્રેસમાં નેતૃત્વ બદલાયા બાદ બે ફાટા પડી ગયાં છે. જેની અસર સીધી ઉમેદવારી લીસ્ટ જાહેર કરવા પર જોવા મળી રહી છે. ફોર્મ ભરવાના આડે હવે છેલ્લા દિવસ સુધી કોઇ જ સત્તાવાર નામની જાહેરાત કરવામાં આવી નથી. આ ઉપરાંત પક્ષમાં ઉકળતો ચરૂ બહાર ન આવે તે માટે અપક્ષ તરીકે ઉમેદવારી કર્યા બાદ બારોબાર મેન્ટેડ આપવાનો વ્યૂહ અપનાવવામાં આવ્યો છે.

તમામને બોલાવી મેન્ટેડ આપવામાં આવશે
નડિયાદ પાલિકામાં કોંગ્રેસ તરફથી ઉમેદવારો નક્કી થઇ ગયા છે. આ ઉમેદવારોને શનિવારે મેન્ટેડ આપવામાં આવશે અને કલેક્ટર ઓફિસમાં જ સીધા જમા કરાવી દેવામાં આવશે.> હાર્દિક ભટ્ટ, શહેર કોંગ્રેસ પ્રમુખ, નડિયાદ.