રાજકારણ:કઠલાલ APMCના ચેરમેનને ઘરભેગા કરવા સભાસદો સક્રિય

છેલ્લાં કેટલાંક અરસાથી ખેડા જિલ્લા ભાજપામાં રાજકીય ઉથલપાથલના ખાંડા ખખડાવાઇ રહ્યાં છે. અગાઉ ખેડા શહેર સંગઠનના પૂર્વપ્રમુખ સહિતના 72 સભ્યોએ ભાજપાના સભ્યપદેથી રાજીનામા ધરી દીધાં બાદ કઠલાલ તાલુકા સંગઠનના પૂર્વમહામંત્રી સહિત 50 જેટલાં સદસ્યોએ ભાજપામાંથી રાજીનામા ધરી દીધાનો ભડકો ટાઢો થયો નથી.

ત્યાં કઠલાલ માર્કેટિંગયાર્ડના ચેરમેન હસમુખભાઇ ગલાબભાઇ પરમાર સામે ચૂંટાયેલાં ડીરેક્ટર-સભ્યોએ બાંયો ચડાવી છે અને આવતીકાલે સોમવારે નડિયાદ ખાતેના બહુમાળી ભવનમાં જિલ્લા રજિસ્ટ્રાર રીનાબેન પટેલને મળી કઠલાલ યાર્ડના ચેરમેનને ઘરભેગા કરવાની માગણી અને ચેરમેન વિરૂધ્ધ મતદાન કરવાની તૈયારી સાથે યાર્ડના ચૂંટાયેલાં 10 ડીરેક્ટર અવિશ્વાસની દરખાસ્ત રજૂ કરનાર છે તેમ કઠલાલ APMCના ડીરેક્ટર લક્ષ્મણસિંહ (લખનસિંહ) ડાભીએ જણાવ્યું હતુ.

અમે સમાધાન કરવા સહમત નથી
કઠલાલ તાલુકા ભાજપા સંગઠનના પૂર્વમહામંત્રી લખનસિંહ ડાભી તથા અન્ય હોદ્દેદારો સહિતના 50 જેટલાં સભ્યોએ રાજીનામા આપી દીધાના મામલે ખેડા જિલ્લા ભાજપા પ્રમુખ અર્જૂનસિંહ ચૌહાણે કાર્યકરો સાથે સમજાવટ કરી બે દિવસમાં મનાવી લઇશું તેવી વાત કરી હતી. જેની સામે સંગઠનના પૂર્વમહામંત્રી લખનસિંહએ કહ્યું કે, કોઇ નેતા સાથે અમારી કોઇ વાતચીત થઇ નથી. આ બાબતે અમે સમાધાન કરવા સંમત નથી. આગામી દિવસોમાં કઠલાલ તાલુકા ભાજપાના અન્ય કાર્યકરો પણ સાગમટે આપશે.