ચૂંટણી:નડિયાદ પાલિકામાં કોંગ્રેસનો પનો ટુંકો પડ્યો, બે વોર્ડમાં મેન્ડેટ જ નહીં

ખેડા જિલ્લામાં કોંગ્રેસની હાલત કેટલી દયનીય છે તે સ્થાનિક સ્વરાજ્યની ચૂંટણીમાં ખુલ્લુ પડી ગયું છે. જિલ્લાની છ વિધાનસભા બેઠકમાં ત્રણમાં કોંગ્રેસના ધારાસભ્યો હોવા છતાં નડિયાદ પાલિકા માટે કોઇ જ દોરી સંચાર મળી રહ્યો નથી. જેને કારણે નવા નિમાયાં હોદ્દેદારો નિર્ણય લેવામાં અફડાઇ રહ્યાં છે. ફોર્મ ભરવાના છેલ્લા દિવસે પણ કોને મેન્ટેડ આપવું કોને નહીં ? તે બાબતે અસંમજસ સ્થિતિ સર્જાઇ હતી.

નડિયાદ નગરપાલિકાની ચૂંટમીમાં કોંગ્રેસની હાલત કફોડી બની રહી છે. હોદ્દેદારોની નિમણૂંક બાદ શરૂ થયેલા આંતરિક રાજકારણની સીધી અસર ટીકીટ ફાળવણી પર જોવા મળી રહી છે. હોદ્દેદારોની હાથ જોડીને ઉમેદવારો તૈયાર કરવા પડ્યા છે, તેમાંય પણ હવે વોર્ડ નં.12 અને 13માં એક પણ ઉમેદવાર મળ્યાં નથી. જેને કારણે અપક્ષથી જ ગાડુ ગબડાવવું પડશે. આ નિષ્ફળતા પાછળ હોદ્દેદારો પક્ષના નીતિને જવાબદાર ગણી રહ્યાં છે.

પક્ષ દ્વારા સામાજિક સંસ્થાઓના સહકારથી અપક્ષ ઉમેદવારોના ટેકાથી ચૂંટણી લડવાનો નિર્ણય લેવાયો હોવાનું જણાવી હાથ અધ્ધર કરી રહ્યા છે. જોકે, હવે પ્રચારમાં જુથવાદ નડશે કે કેમ ? તે જોવાનું રહ્યું. બાકી ટીકીટ ફાળવણીમાં નડિયાદ કોંગ્રેસમાં લોઢાના ચણા ચાવવા બરાબર સ્થિતિ ઉભી થઈ હતી. નડિયાદના કોંગ્રેસના ગઢ ગણાતા વિસ્તારમાં જ કોંગ્રેસના કાર્યકરોએ અપક્ષ લડવાનું મન બનાવી લેતા તે વોર્ડની યાદી જાહેર કરવામાં આવી ન હતી.