વિવાદ:ડાકોરમાં નજીવી બાબતે બે પરિવારો બાખડયાં, પાંચને ઇજા, 7 વિરુદ્ધ સામસામી ફરિયાદ

ડાકોરના નવાપુરા વિસ્તારમાં રહેતા ચંચળબેન ભીખાભાઈ સોલંકી ઉ 50 ના દિકરા દેવ અને યસ બુધવારે સાંજના સમયે ઘરની બહાર રમતા હતા. ત્યારે કૃણાલ ચૌહાણ અને તેનો ભાઈ રાહુલ રાજેશભાઈ ચૌહાણ બંને દીકરાઓને ખિજવતા હોઈ ચંચળબેન ઘરની બહાર આવી રાજેશ અને રાહુલને ઠપકો આપતાં બંને જણા ઉશ્કેરાઇ ગયા હતા, અને ગાળો બોલવા લાગ્યા હતા. ચંચળબેન એ ગાળો બોલવાની ના પાડતાં નજીકમાંથી લાકડાનો દંડો લઇ આવી કૃણાલ અને રાજેશે તેમના પર હુમલો કરી દીધો હતો.

જે ઘટનામાં છોડવા વચ્ચે પડેલા સુરેશભાઈ અને વિમળાબેનને પણ ઈજાઓ પહોંચી હતી. સમગ્ર મામલે ડાકોર પોલીસ મથકે ફરિયાદ આપતા પોલીસે રાજેશભાઈ, રાહુલભાઈ અને કૃણાલ વિરુદ્ધમાં ગુનો દાખલ કર્યો હતો. બીજી તરફ રાહુલભાઈ પણ ફરિયાદ નોંધાવી છે. તેમણે જણાવ્યું છે કે બુધવારે રાત્રે તેઓ તેમના ભાઈ સાથે ઘરની બહાર ઉભા હતા અને કુણાલ તેમના મિત્ર ગોપાલભાઈ રાવળ સાથે મસ્તી કરતો હતો. દરમિયાન ચંચળબેન ઘરેથી આવ્યા હતા અને મારા છોકરાઓને કેમ ખીજવી રહ્યા છો? તેમ કહી કૃણાલ અને રાજેશ ને ગાળો બોલવા લાગ્યા હતા.

તેમજ તેઓએ બંને ભાઈઓને ગડદાપાટુનો માર પણ માર્યો હતો. જેનું ઉપરાણું લઇ દીકરો દેવ સોલંકી અને યસ સોલંકી તથા સુરેશભાઇ સોલંકી પણ સ્થળ પર આવી ગયા હતા અને કૃણાલ તેમજ રાહુલને માર માર્યો હતો. જે બાબતે રાહુલે ચાર ઈસમો વિરૂધ્ધ ફરિયાદ નોંધાવી છે. આમ સમગ્ર ઘટનામા પાંચ લોકોને ઈજા પહોંચી છે. જ્યારે સાત વિરુદ્ધ સામ- સામે ફરિયાદો નોંધાઇ છે