રજૂઆત:પાલનપુરના નલાસર ગામે અનુસુચિત જાતિના બહિષ્કાર મામલે ખેડામાં કલેક્ટર કચેરીએ આવેદનપત્ર અપાયું

ખેડા જિલ્લા સામાજિક એકતા જાગૃતિ મિશન દ્વારા આજે અધિક કલેક્ટરને એક આવેદનપત્ર આપી રજૂઆત કરવામાં આવી છે. પાલનપુર તાલુકાના નલાસર ગામે ગ્રામજનોએ અભળસેટ પ્રવૃત્તિ અપનાવી ગામના અનુસુચિત જાતિના સમાજનો બહિષ્કાર કર્યો છે. જે બાબતે રજૂઆત કરતાં તે તમામ વિરુદ્ધ પગલાં ભરાતા આજે આ મિશને રાજ્યવ્યાપી વિરોધ દર્શાવ્યો છે.

ખેડા જિલ્લા સામાજિક એકતા જાગૃતિ મિશન દ્વારા આ અંગે શનિવારે ખેડા અધિક કલેકટરને એક આવેદનપત્ર સુપ્રત કર્યું છે. મુખ્યમંત્રીને ઉદ્દેશીને અપાયેલા આ આવેદનપત્રમાં જણાવ્યા મુજબ, બનાસકાંઠા જિલ્લાના પાલનપુર તાલુકાના નલાસર ગામે ગ્રામજનો દ્વારા અનુસુચિત જાતિના સમાજનો બહિષ્કાર કર્યો છે. જે બાબતે ગત રોજ સામાજિક એકતા જાગૃતિ મિશન દ્વારા બનાસકાંઠા જિલ્લા સમાહર્તાને આવેદનપત્ર પાઠવવામાં આવ્યું હતું જે સમયે આ મિશનના કેટલાક આગેવાનોની ધરપકડ કરવામાં આવી હતી.

દોષિત વ્યક્તિઓને પકડવાને બદલે નિર્દોષ વ્યક્તિની ધરપકડ કરવામાં આવતા ભારે રોષ ફેલાયો છે. આજે આ મિશન દ્વારા રાજ્ય વ્યાપી વિરોધ દર્શાવ્યો છે. ખેડા જિલ્લા સામાજિક એકતા જાગૃતિ મિશન દ્વારા આ અંગે ખેડા જિલ્લા કલેકટર કચેરી ખાતે અધિક કલેકટરને આવેદનપત્ર અપાયું છે અને નિર્દોષને હેરાન કરવાને બદલે દોષિત લોકો સામે કાર્યવાહી કરવા માંગ કરાઈ છે.