દર્દીઓને હાલાકી:ખેડા જિલ્લાના CHCમાં ડૉકટરો ગેરહાજર

ખેડા જિલ્લામાં કોરોના નો કહેર વધી રહ્યો છે અને દર્દીઓની સંખ્યા પણ દિવસે દિવસે વધી રહી છે ત્યારે વધતા કોરોના કેસો વચ્ચે ડોક્ટરોની ગેરહાજરીના કિસ્સા બહાર આવ્યા છે. જિલ્લાના કઠલાલ અને લસુન્દ્રા આરોગ્ય કેન્દ્ર પર ડોકટરોની ગેરહાજરી ને પગલે દર્દીઓ ભગવાન ભરોસે મુકાયા છે. ખેડા જિલ્લા પંચાયતના સભ્ય અને પૂર્વ આરોગ્ય ચેરમેન પ્રવિણસિંહ રાઠોડે જણાવ્યું છે કે કઠલાલ તાલુકાના લસુન્દ્રા ગામે હાલ 19 થી વધુ કોરોના ના એક્ટિવ દર્દીઓ છે, અને દિવસે ને દિવસે કેસો વધી રહ્યા છે. પરંતુ ગંભીર બાબતે છે કે લસુન્દ્રા આરોગ્ય કેન્દ્ર પર 20 માર્ચ પછી ડોક્ટરની ગેરહાજરી જોવા મળી છે.

જિલ્લા આરોગ્ય અધિકારી ડો. પ્રકાશ સુથાર અને જિલ્લા વિકાસ અધિકારી ડી.એસ. ગઢવીને રજૂઆતો કરવા છતાં અહીંયા ડોકટરોની ભરતી નહીં થતી હોવાનો આક્ષેપ ખુદ સત્તાધારી પક્ષના સભ્યએ કર્યો છે. આજ પ્રકારની સ્થિતિ કઠલાલ આરોગ્ય કેન્દ્રમાં પણ છે. જ્યાં ત્રણ ડોક્ટરોના મહેકમ સામે હાલ માત્ર એક જ ડોક્ટર ફરજ બજાવી રહ્યા છે. સ્થાનિકો દ્વારા અગાઉ જિલ્લા કક્ષાએ ફરિયાદ કર્યા બાદ આરોગ્ય વિભાગે એક ડોક્ટર અહીંયા મૂક્યા છે. પરંતુ નગરપાલિકા વિસ્તારની વસ્તી સામે અને 3 ડોક્ટરના મહેકમ સામે માત્ર 1 ડોકટર કેટલી કામગીરી કરી શકે તે સમજી શકાય તેમ છે.