હુમલો:મહુધાના ચુણેલમાં પશુઓ દ્વારા ભેલાણ કરાતા તકરાર, ડાંગથી ફટકારી ધમકી આપતા ફરિયાદ

મહુધાના ચુણેલ ગામે રહેતા વિરેન્દ્રકુમાર પટેલ તેમના ખેતરમાં તથા તેમના કાકા ચંદુભાઇ પટેલ બાજુના ખેતરમાં કામ કરતાં હતા. આ સમયે નવઘણ ભરવાડે પોતાના પશુ ચંદુભાઇના ખેતરમાં છૂટા મૂકી દીધા હતા. જેથી ચંદુભાઇએ તેને પશુઓને ખેતરની બહાર લઇ જવાનું કહેતા, નવઘણ ઉશ્કેરાયો હતો અને તમારાથી થાય તે કરી લો, પશુ બહાર નહીં જ કાઢુ અને દરરોજ અહીં જ ચરાવવા આવીશ તેમ કહીને ઝઘડો કર્યો હતો.

આ સમયે ઉશ્કેરાયેલા નવઘણે લાકડાની ડાંગ અને હાથમાં પહેરેલા કડાંથી ચંદુભાઇને માર માર્યો હતો અને જાનથી મારી નાખવાની ધમકી આપી ત્યાંથી જતો રહ્યો હતો. ઘવાયેલા ચંદુભાઇને તેમના ભત્રિજા વિરેન્દ્રકુમાર સારવાર અર્થે નડિયાદની ખાનગી હોસ્પિટલમાં ખસેડ્યા હતા. આ મામલે મહુધા પોલીસે ગુનો નોંધી કાયદેસરની કાર્યવાહી હાથ ધરી છે.