ક્રાઇમ:મિત્રાલમાં ધોળા દહાડે બે મંદિરમાંથી પીત્તળનો ઘંટ- તાંબાના થાળની ચોરી

વસો તાલુકાના મિત્રાલ ગામના બે મંદિરમાં ધોળા દિવસે તસ્કરોએ પીત્તળનો ઘંટ અને તાંબાના થાળની ચોરી કરીને પલાયન થઇ ગયાની ફરિયાદ વસો પોલીસ સ્ટેશનમાં નોંધાઇ છે. વસો તાલુકાના મિત્રાલ ગામના ભરચક વિસ્તારમાં શ્રી મહાકાલેશ્વર મહાદેવ મંદિર આવેલું છે. આ મંદિરમાં કોઇ અજાણ્યો શખસ દર્શન કરવાના બહાને ગત 28મીએ સવારે 11 વાગે આવી મંદિરમાં લગાડેલાં આશરે 7 કિલો વજનના પીત્તળના ઘંટનો હાથફેરો કરી ગયો હતો.

ઉપરાંત, નજીકમાં આવેલ તમાકુની ખળી પાસેના શ્રી મેલડી માતાજીના મંદિરમાંથી તાંબાના થાળની પણ ચોરી થઇ હતી. અહીંના બે મંદિરમાં ચોરી થવાના બનાવના પગલે શ્રધ્ધાળુ ગ્રામજનોમાં હલચલ મચી ગઇ હતી. આ અંગે વસો પોલીસ સ્ટેશનમાં અરજી આપવામાં આવી હતી. ઉલ્લેખનીય છે કે, ભૂતકાળમાં મિત્રાલના ઇન્દીરાનગરીમાં રહેતી મહિલાના ગળાના ભાગે ઇજા પહોંચાડી સોનાના માદળિયાની લૂંટની ઘટના ઘટી હતી. જે ગુનાનો ભેદ ઉકેલાયો નથી. મિત્રાલ સહિતના ગામોમાંથી છાસવારે પશુચોરીની ફરિયાદો ઉઠતી રહી છે.