અકસ્માત:વિરપુરમાં જેસીબીની ટક્કરથી બાઇકસવારનું મોત : એક ગંભીર

વિરપુર નજીક રોડ ઉપર માટી પુરાણ કરતી વખતે જેસીબીની ટક્કરથી બાઇકસવાર બે યુવાનને ગંભીર ઇજા થઇ હતી. જેમાં એક યુવાનનું ઘટનાસ્થળે મૃત્યુ નીપજ્યું હતુ. જ્યારે તેની સાથેના યુવકને ગંભીર ઇજા થતાં દવાખાને ખસેડાયો હતો. આ અંગે પોલીસ મથકમાં ફરિયાદ નોંધાવી હતી.

વિરપુર તાલુકાના કોયડમ, નાનસલાયઇ ભાગ-2 રહેતાં રૂપાભાઇ ભેમાભાઇ બારીયા (ઉવ.45)એ વિરપુર પોલીસ સ્ટેશનમાં ફરિયાદમાં જણાવ્યા મુજબ તેમનો દીકરો સુરેશભાઇ રૂપાભાઇ બારીયા તથા શૈલેષભાઇ પર્વતભાઇ બારીયા બાઇક લઇને કુંભારવાડીથી વિરપુર આવતાં હતા. ત્યારે સહજાનંદ પેટ્રોલપંપથી વિરપુર તરફ રોડની બાજુમાં JCB મશીનથી પાઇપલાઇન નાખી હોઇ જેનું માટી પુરાણ કામ ચાલતું હોઇ જેસીબી મશીનના પાવડામાં માટી ભરી રીવર્સ લેતી વખતે બાઇકસવાર સુરેશભાઇ રૂપાભાઇ બારીયાના માથાના ભાગે રેતી ભરેલો પાવડો વાગતાં સુરેશભાઇ તથા શૈલેષભાઇ બાઇક સાથે માટીના ઢગલા ઉપર ફંગોળાઇ ગયા હતા. જેમાં જેસીબીના માટી ભરેલો લોખંડનો પાવડો સુરેશભાઇને માથાના ભાગે વાગતાં તેનું મૃત્યુ નીપજ્યું હતુ. જ્યારે શૈલેષભાઇને ગંભીર ઇજા થઇ હતી. આ અંગે વિરપુર પોલીસે જેસીબી મશીનના ચાલક વિરૂધ્ધ ગુનો નોંધી તેને ઝડપી લેવાની તજવીજ હાથ ધરી હતી.