અકસ્માત:ખેડાના હરિયાળા નજીક અકસ્માતમાં વૃધ્ધનું મોત

ખેડાના હરિયાળા નજીક નેશનલ હાઇવે પરથી પસાર થઇ રહેલા વૃધ્ધને કારના ચાલકે અડફેટે લેતાં તેમનું ગંભીર ઇજાઓને કારણે મોત નીપજ્યું હતું. આ મામલે ખેડા ટાઉન પોલીસે અકસ્માત સર્જનાર કારના ચાલક સામે ગુનો નોંધી કાર્યવાહી હાથ ધરી છે.

ખેડાના જેસ્વાપુરામાં નિશાળવાળા ફળિયામાં રહેતા ગોપાલભાઇ બેચરભાઇ વાઘેલાના પિતા બેચરભાઇ (ઉ.વ.64) હરિયાળા ચોકડી પાસે આવેલી હોટલમાં નોકરી કરતાં હતા. બુધવારે બેચરભાઇ હાઇવે પર ધોળકા ચોકડી પાસેથી પસાર થઇ રહ્યા હતા તે સમયે પૂરપાટ ઝડપે આવી રહેલી કારના ચાલકે બેચરભાઇને અડફેટે લેતાં તેમને માથાના અને શરીરના ભાગે ગંભીર ઇજા થતાં સ્થળ પર જ મૃત્યુ પામ્યા હતા. આ મામલે ગોપાલભાઇની ફરિયાદના આધારે ખેડા ટાઉન પોલીસે અકસ્માત સર્જનાર કારના ચાલક સામે ગુનો નોંધી કાર્યવાહી હાથ ધરી છે.