અકસ્માત:લસુન્દ્રા નજીક બે વાહન વચ્ચે અકસ્માત, 4ને ઇજા, બોલેરોના ચાલક સામે ગુનો નોંધાયો

કઠલાલ તાલુકાના લસુન્દ્રા નજીકથી પૂરપાટ ઝડપે પસાર થઇ રહેલી બોલેરો ગાડીના ચાલકે ઇકોને ટક્કર મારતાં, ઇકો રોડની સાઇડની ગટરમાં ઉતરી ગઇ હતી. આ અકસ્માતમાં 4 વ્યક્તિઓને ઇજા થઇ હતી. આ મામલે કઠલાલ પોલીસે અકસ્માત સર્જનાર બોલેરોના ચાલક સામે ગુનો નોંધી કાર્યવાહી હાથ ધરી છે. પ્રાપ્ત રેલ્વે પોલીસ સૂત્રો દ્વારા મળતી માહિતી અનુસાર કઠલાલના લસુન્દ્રામાં રહેતા જતીનભાઇ ભીખાભાઇ વસાવા પોતાના પરિવાર અને મિત્ર સાથે નનાદરા પોતાના ખેતરે જઇ રહ્યા હતા.

તેઓ ઇન્દોર અમદાવાદ હાઇવે પર બાજપઇ નગરી પાસે રોડની સાઇડમાં ઉભા હતા, તે સમયે ફાગવેલ તરફથી બેદરકારીથી ચલાવી આવી પુરપાટ ઝડપે આવી રહેલી બોલેરો ગાડીના ચાલકે ઇકોને ટક્કર મારતાં ગાડી રોડની સાઇડની ગટરમાં ઉતરી ગઇ હતી. આ અકસ્માતમાં ચંદનબેન, સંજયભાઇ, નન્નુબેન, જીયાબેનને ઇજા થઇ હતી. આ મામલે જતીનભાઇની ફરિયાદના આધારે કઠલાલ પોલીસે અકસ્માત સર્જનાર બોલેરો ગાડીના ચાલક સામે ગુનો નોંધી કાર્યવાહી હાથ ધરી છે.