કાર્યવાહી:સેવાલીયામાં બે કન્ટેઇનરમાંથી 39.36 લાખનો દારૂ પકડાયો

સેવાલીયા પોલીસે મહારાજના મુવાડા ચેકપોસ્ટ પરથી વાહન ચેકિંગ દરમિયાન દારૂ ભરેલા કન્ટેઇનરને ઝડપી પાડી, બાડમેરના શખ્સની અટક કરી હતી. પોલીસે રૂ.39,36,000 ની કિંમતનો દારૂ મળી કુલ રૂ. 53,44,500 નો મુદ્દામાલ કબજે લઇ કાયદેસરની કાર્યવાહી હાથ ધરી છે.

હાલમાં ઝડપાયેલા શખ્સને કોવિડ ટેસ્ટ માટે મોકલી આપવાની તજવીજ હાથ ધરવામાં આવી છે. સેવાલીયા પોલીસની ટીમ મહારાજના મુવાડા નજીક વાહન ચેકિંગમાં હતી તે સમયે રાજસ્થાન પાસિંગનું કન્ટેઇનર રોકીને તેમાં તપાસ કરતાં ખાલી કન્ટેઇનરમાં કાંઇ મળ્યું ન હતું. પરંતુ શંકાના આધારે પોલીસે ઝીણવટભરી રીતે કન્ટેઇનર તપાસતાં પાછળના ભાગમાં તો કાંઇજ ન હતું, પરંતુ આગળના કન્ટેઇનરના ઉપલાં ભાગમાં દારૂની પેટી સંતાડેલી હતી. જેથી પોલીસે ચાલક સત્તારામ ધર્મારામજાટ (રહે.બાડમેર) ની અટક કરી હતી.

રિમાન્ડ મેળવવાની તજવીજ હાથ ધરાશે
સેવાલીયા પોલીસ મથકના પોલીસ સબ ઇન્સપેક્ટર એમ.વી.અસારીએ જણાવ્યું હતું કે, મહારાજના મુવાડાથી પકડેલા દારૂના જથ્થા સાથે ઝડપાયેલા કન્ટેઇનર ચાલકને કોવિડ ટેસ્ટ બાદ કોર્ટમાં રજૂ કરી તેના રિમાન્ડ મેળવશું. હરિયાણાથી દારૂ ભરીને રાજકોટ લઇ જવાનો હોવાનું હાલમાં ચાલકે જણાવ્યું છે.