આક્ષેપ:કપડવંજ-મોડાસા રેલવેનો 22 કિ.મી.નો ટ્રેક નવો કરવા માગ

નડિયાદથી કપડવંજ અને મોડાસા રેલવે લાઇન માટે કપડવંજ વિકાસ પરિષદના દિનેશભાઈ શાહ, અભય શાહ, નેમુભાઈ તેલી તથા મોડાસા વિકાસ પરિષદ તરફથી કેતનભાઈ શાહ, અશ્વિનભાઈ શાહ (સોલિસિટર) તથા અરવિંદભાઈ દરજી એ વેસ્ટર્ન રેલવેના જનરલ મેનેજર આલોકભાઈ કંસલ સાથે મુંબઈ ખાતે મુલાકાત કરી વિવિધ મુદ્દાઓ અંગે ચર્ચા વિચારણા કરી હતી. ડેલિગેશને જણાવ્યું છે કે, નડિયાદ - કપડવંજ - મોડાસા રેલવે લાઇન કે જે 106 કિલોમીટર છે. તેમાં 87 ફાટકો આવે છે. જે ખુલ્લી ફાટકો વહેલી તકે બંધ થવા ઉપર ભાર મૂક્યો હતો.

જેના માટે અંડરગ્રાઉન્ડ કે ઓવરબ્રિજ જેવા રસ્તા બનાવવા અનુરોધ કર્યો હતો. જેના લીધે હાલ સવા ત્રણ કલાકનો સમય વ્યતીત થાય છે. તેના બદલે ફક્ત દોઢ જ કલાકમાં સદર અંતર કાપી શકાશે. આ ઉપરાંત મુંબઇથી મોડાસા બ્રોડગેજ છે, તે પ્રાયોગિક ધોરણે સપ્તાહમાં એક વખત મુંબઇ મોડાસા રેલ સેવા શરૂ કરવા અનુરોધ કર્યો હતો. રેલવેને સારી રેવન્યુ પ્રાપ્ત થાય તો કાયમી ધોરણે એક રેલ સેવા શરૂ કરવા માટે માગણી કરી હતી. તેના પ્રત્યુત્તરમાં જનરલ મેનેજરે હકારાત્મક અભિગમ દાખવી રાજ્ય સરકાર સાથે સંકલન કરી ટ્રેકમાં જરૂરી અડચણો દૂર કરવા તેઓ અનુરોધ કરશે.