ધરપકડ:કલાકારો અને ક્રિકેટરના પેનને આધારે ઠગાઈ કરનારા ઝડપાયા

એક અભૂતપૂર્વ સાઈબર છેતરપિંડીના પ્રકરણમાં સાઈગર ઠગોએ બોલીવૂડના કલાકારો અને ક્રિકેટરોના જીએસટી નંબર પરથી પેનની વિગતો પ્રાપ્ત કરીને પુણે સ્થિત ફિનટેક સ્ટાર્ટઅપ વન કાર્ડ પાસેથી પોતાને નામે ક્રેડિટ કાર્ડ કઢાવીને છેતરપિંડી કરી હતી. કંપનીને આ અંગે જાણ થતાં જ તુરંત દિલ્હી પોલીસને જાણ કરી હતી, જેને લઈ દિલ્હી પોલીસે પુનીત, મહંમદ આસીફ, સુનિલ કુમાર, પંકજ મિશ્રા અને વિશ્વ ભાસ્કરની ધરપકડ કરી છે. આરોપીઓ પોલીસને હાથ લાગ્યા ત્યાં સુધી તેમણે છેતરપિંડીથી મેળવેલાં ક્રેડિટ કાર્ડસ પર રૂ. 21.32 લાખની ખરીદી પણ કરી નાખી હતી.

આરોપીઓએ ખાસ કરીને અભિષેક બચ્ચન, શિલ્પા શેટ્ટી, માધુરી દીક્ષિત, ઈમરાન હાશ્મી અને મહેન્દ્ર સિંહ ધોનીનાં નામ અને તેમની વિગતોનો ઉપયોગ કર્યો હતો. આ અંગે વધુ તપાસ ચાલી રહી છે, એમ ડીસીપી શહદ્ર રોહિત મીનાએ શુક્રવારે જણાવ્યું હતું.આરોપીઓની ધરપકડ પછી ઊલટતપાસ લેતાં તેમણે મોડસ ઓપરેન્ડી જણાવી હતી. તેઓ ગૂગલ પરથી સેલિબ્રિટીઓની જીએસટી વિગતો મેળવતા હતા. જીએસટીઆઈએનના પ્રથમ બે આંકડા રાજ્યનો કોડ હોય છે અને આગામી 10 આંકડા પેન નંબર હોય છે તે આ ઠગો બરોબર જાણતા હતા.

સેલિબ્રિટીઓની જન્મતારીખ ગૂગલ પર ઉપલબ્ધ હોવાથી તેમનો પેન અને જન્મતારીખ મળીને પેનની વિગતો પૂર્ણ થાય છે. ઠગો છેતરપિંડીથી નવો પેન કાર્ડ બનાવતા હતા, જેની પર પોતાની તસવીરો મૂકી દેતા હતા, જેથી વિડિયો વેરિફિકેશન દરમિયાન તેમનો લૂક પેન કે આધાર કાર્ડ પર ઉપલબ્ધ ફોટો સાથે મેચ થાય. દાખલા તરીકે, અભિષેકના પેન કાર્ડ પર તેનો પેન અને જન્મતારીખ હતો, પરંતુ તસવીર ઠગની હતી.આ રીતે તેમણે સેલિબ્રિટીઓની આધારની વિગતો મેળવી હતી. આ માહિતી મેળવ્યા પછી તેમણે ક્રેડિટ કાર્ડ માટે અરજી કરી હતી.

વિડિયો વેરિફિકેશન દરમિયાન તેમને તેમની નાણાકીય પ્રવૃત્તિઓ સંબંધમાં પ્રશ્નો પૂછવામાં આવ્યા હતા, જેના તેમણે આસાનીથી ઉત્તર આપ્યા હતા, કારણ કે સિબિલ પાસેથી તેમને આ બધી વિગતો મળી ગઈ હતી. વળી, આ સેલિબ્રિટીઓનો સિબિલ સ્કોર સારો હોવાથી અન્ય બેન્ક અને નાણાકીય સંસ્થાઓ પાસેથી તેમને નામે આસાનીથી ક્રેડિટ કાર્ડ મળી શકે એ તેઓ જાણતા હતા, એમ પોલીસે જણાવ્યું હતું.ઉપરાંત તેઓ એ વાત પણ જાણતા હતા કે ઓનલાઈન વેરિફિકેશન પ્રણાલી અભિષેક બચ્ચનને ફિલ્મસ્ટાર તરીકે ઓળખતી નથી.

આથી અભિષેકની પેન અને આધારની વિગતો પર આરોપી પંકજ મિશ્રાની તસવીર સાથે ક્રેડિટ કાર્ડ મેળવવાનું અત્યંત આસાન બની ગયું. આ અંગે વધુ તપાસ ચાલી રહી છે. આરોપીઓએ આ રીતે હજુ વધુ ક્રેડિટ કાર્ડસ મેળવ્યાં હોવાની શંકા છે, એમ પોલીસે જણાવ્યું હતું.

છટકબારી શોધવા મહિનાઓનું સંશોધન
આરોપીઓએ ઓનલાઈન વેરિફિકેશન અને ક્રેડિટ કાર્ડસ જારી કરવાની પદ્ધતિનો ઉપયોગ કરવા તેમાં છટકબારીઓ શોધી કાઢવા માટે અનેક મહિનાઓ સુધી ઓનલાઈન સંશોધન કર્યું હતું. દરમિયાન પુણે સ્થિત એફપીએલ ટેકનોલોજીઝ વન કાર્ડ અને વન સ્કોર એપમાં તે જ વર્ચ્યુઅલ પ્રસ્તુતિ સાથે વન કાર્ડ જારી કરે છે, જે કોન્ટેક્ટલેસ મેટલ ક્રેડિટકાર્ડ જારી કરે છે, જેથી ગ્રાહકો કોઈ પણ ઓનલાઈન અથવા એપ આધારિત લેણદેણ કે ખરીદી માટે તેનો ઉપયોગ કરી શકે, એમ કંપનીએ પોલીસ ફરિયાદમાં જણાવ્યું છે.

આરોપીઓ દ્વારા એપ થકી સંપર્ક
કંપનીએ આરોપ કર્યો છે કે આરોપીઓએ પોતાને નામે ક્રેડિટ કાર્ડ જારી કરાવવા પેન અને આધાર નંબર જેવી વિગતો અપલોડ કરીને તેમના એપ થકી કંપનીનો સંપર્ક કર્યો હતો. ક્રેડિટ બ્યુરોની વિગતો ધ્યાનમાં લીધા પછી ક્રેડિટ લિમિટ નક્કી કરાય છે. આરોપીઓએ ઓરિજિનલ પેન અને આધાર અને જન્મતારીખ અકબંધ રાખ્યા હતા અને અમારા એપ પર બોગસ પેન અને આધાર અપલોડ કર્યા હતા. આ મુજબ અમારી પ્રણાલીએ ઓરિજિનલ પેનને આધારે બ્યુરોની વિગતો મેળવી હતી અને ક્રેડિટ લિમિટ સૂચવી હતી, એમ કંપનીએ પોલીસ ફરિયાદમાં જણાવ્યું છે.

રૂ. 10 લાખની ક્રેડિટ લિમિટ
આરોપીઓએ તેમના અસલ સમયની સેલ્ફી અપલોડ કરી હતી, જે બોગસ પેન અને આધાર પરના ફોટો સાથે મેચ થઈ હતી. આ મુજબ આરોપીઓને પ્રત્યેકી રૂ. 10 લાખની ક્રેડિટ લિમિટ મંજૂર કરાઈ હતી. આરોપીઓએ એક સપ્તાહમાં જ આ લિમિટ પાર કરી દીધી હતી અને તેની સામે કોઈ પુનઃચુકવણી કરી નહોતી. એક ડિવાઈસનો ઉપયોગ કરીને અનેક વાર આરોપીઓએ ઓનબોર્ડિંગ કરવાનો પ્રયાસ કરતાં અમારી પ્રણાલીએ એલર્ટ કરી હતી. દા.ત. આરોપીઓએ સાત ડિવાઈસમાંથી કુલ 83 પેનની વિગતોન ઉપયોગ કરીને અમારી સાથે ઓનબોર્ડ થવાનો પ્રયાસ કર્યો હતો.