ભાસ્કર વિશેષ:અફાટ સમુદ્ર અને ફ્લેમિંગોના ટોળાનો નજારો

શિવરીથી ન્હાવાશેવા મુંબઈ ટ્રાન્સહાર્બર લિન્ક રોડ સીલિન્ક પરથી જતા સમયે પ્રવાસીઓ અફાટ સમુદ્રને જોઈ શકશે. મુંબઈ મહાનગર પ્રદેશ વિકાસ પ્રાધિકરણ તરફથી એના માટે સીલિન્ક પર ફક્ત 3 ફૂટનો કઠેડો ઊભો કરવામાં આવશે. એના પર સ્ટીલ રેલિંગ નાખવામાં આવશે. તેથી આ સ્ટીલ રેલિંગ અને કઠેડા વચ્ચે આરપાર જોવા માટે ખુલ્લી જગ્યા છોડવામાં આવશે. એમાંથી વાહનચાલકો સમુદ્રની સાથે જ ફ્લેમિંગોને જોવાનો નજારો માણી શકશે.

નવી મુંબઈ અને દક્ષિણ મુંબઈને સીધા જોડવા મહત્વના 21.7 કિલોમીટર લાંબા શિવરી-ન્હાવાશેવા સીલિન્કનું કામ ઝડપથી ચાલી રહ્યું છે. એમાં 16.5 કિલોમીટર લાંબો પુલ સમુદ્રમાં બાંધવામાં આવી રહ્યો છે. હાલની સ્થિતિમાં આ પુલનું લગભગ 90 ટકા કામ પૂરું થયું છે. પુલ પરના મોટા ભાગમાં ગર્ડર ઊભા કરવાનું કામ પૂરું થવાની અણી પર છે. એમાંથી હવે એમએમઆરડીએએ ગર્ડર ઊભા છે એ ભાગમાં સંરક્ષણ કઠેડા ઊભા કરવાનું કામ શરૂ કર્યું છે. આ સીલિન્ક પરથી જતા વાહનચાલકો સમુદ્રને જોઈ શકે એ દષ્ટિએ એના પર સંરક્ષણ કઠેડા ઊભા કરવામાં આવશે.

એના માટે સીલિન્ક પર 5 ફૂટના બદલે 3 ફૂટની સિમેન્ટ-કોંક્રિટની ભીંત ઊભી કરીને એના પર 2 ફૂટની ઉંચાઈએ સ્ટીલની રેલિંગ લગાડવામાં આવશે. એમાંથી 2 ફૂટનો ભાગ પ્રવાસીઓ આરપાર જોઈ શકે એ માટે ખુલ્લો રાખવામાં આવશે.

દક્ષિણ કોરિયાથી મગાવેલા 650 મિલીમીટર ઉંચાઈના ભાગમાં ગેલ્વેનાઈઝ્ડ સ્ટીલ રેલિંગનું બાંધકામ ઝડપથી કરવામાં આવી રહ્યું છે. સંરક્ષણ કઠેડાની આ નવી ડીઝાઈન યુકે અને દક્ષિણ કોરિયામાં સફળતાપૂર્વક કરવામાં આવી છે. હાલની સ્થિતિમાં છેલ્લા એક મહિનામાં આ રેલિંગના કાસ્ટિંગનું કામ 12 ટકા પૂરું થયું છે એવી માહિતી એમએમઆરડીએના મહાનગર આયુક્ત એસ.વી.આર. શ્રીનિવાસે આપી હતી. સુરક્ષિતતા સાથે જ સમુદ્ર અને ફ્લેમિંગો જોવાનો આનંદ માણી શકાશે એ રીતે એની રચના કરવામાં આવી હોવાનું તેમણે સ્પષ્ટ કર્યું હતું.

નવી મુંબઈ જવા સમયની બચત
આ પ્રકલ્પનું લગભગ 90 ટકા કામ પૂરું થવામાં છે. બાકીનું કામ પૂરું કરીને આ પ્રકલ્પ સપ્ટેમ્બર 2023 સુધી વાહનવ્યવહાર માટે ખુલ્લો કરવાનો એમએમઆરડીએનો પ્રયત્ન છે. એમટીએચએલ બાંધવા માટે લગભગ 17 હજાર 843 કરોડ રૂપિયાનો કુલ ખર્ચ અપેક્ષિત છે. આ પ્રકલ્પના કારણે દક્ષિણ મુંબઈથી નવી મુંબઈ આંતરરાષ્ટ્રીય એરપોર્ટ સાથે સીધા જોડાણ મળશે. ગોવા, પુણેથી આવતા વાહનોને નવી મુંબઈમાં દાખલ થવા લાગતા સમયમાં ઘણી બચત થશે.