અકસ્માત:મોરબીના લીલાપર પાસે ટ્રકે બાઇકને અડફેટે લીધી, બાઇક ચાલકનું મોત

મોરબી નજીક લીલાપર ગામ પાસે મચ્છુ નદી નજીક રોડ ઉપર ટ્રકની અડફેટે બાઇક ચાલકનું ઘટનાસ્થળે જ કમકમાટીભર્યું મોત નીપજ્યું હતું. આ બનાવ અંગે મૃતક યુવાનના ભાઇએ તાલુકા પોલીસ સ્ટેશને ફરીયાદ નોંધાવતા પોલીસે અકસ્માત અંગેનો ગુન્હો દાખલ કરી આરોપી ટ્રક ચાલકને ઝબ્બે કરવાના ચક્રો ગતિમાન કર્યા છે.

બેકાબૂ ટ્રકે બાઇકને અડફેટે લીધી
આ બનાવની મોરબી તાલુકા પોલીસ મથકેથી પ્રાપ્ત વિગતાનુસાર લિલાપર ગામ પાસે મચ્છુ નદી નજીક રોડ પરથી બાઇક નંબર GJ-36-P-7952 લઇને હસમુખભાઇ અગ્રાવત ( રહે-રવાપર ) પસાર થઇ રહ્યાં હતા ત્યારે સામેથી માંતેલા સાંઢની માફક પુર ઝડપે આવતા ટ્રક નંબર GJ-36-T-8963ના ચાલકે સ્ટીયરીંગ પરનો કાબૂ ગુમાવી બાઇકને અડફેટે લીધી હતી.

સારવાર મળે તે પહેલા મૃત્યુ થયુ
આ અકસ્માતમાં બાઇક ચાલક હસમુખભાઇ અગ્રાવતને હાથે, પગે અને માથાના ભાગે ગંભીર ઇજાઓ પહોંચી હતી. તેમને સારવાર અર્થે નજીકની હોસ્પિટલે લઇ જવાતા સારવાર મળે એ પહેલા જ બાઇક ચાલક યુવાનનું મોત નીપજ્યું હતુ. મોરબી તાલુકા પોલીસે આ બનાવમાં મૃતક બાઇક ચાલકના ભાઇ અશ્વીનભાઇ તુલસીદાસ અગ્રાવતની પોલીસ ફરીયાદને લઇને ટ્રકના ચાલક વિરૂદ્ધ અકસ્માત અંગેનો ગુન્હો દાખલ કરી ઘટનાસ્થળેથી નાસી છુટેલા બાઇકચાલકને ઝબ્બે કરવાના ચક્રો ગતિમાન કર્યા છે. આ કેસની વધુ તપાસ મોરબી તાલુકા પોલીસ ચલાવી રહી છે.