ગરમીનું જોર ઘટ્યું:મોરબીમાં તાપમાન 3 ડિગ્રી ઘટી 40એ પહોંચ્યું, શરદી અને તાવના કેસ વધ્યા

રાજ્યમાં માર્ચ એપ્રિલ મહિનામાં કાળઝાળ ગરમીનો અનુભવ થઈ રહ્યો છે તેમાં પણ છેલ્લા બે સપ્તાહથી હિટવેવનો અનુભવ થઈ રહ્યો છે.સૌરાષ્ટ્ર કચ્છમાં પડી રહેલી ગરમીએ લોકોની હાલત કફોડી બનાવી છે.ત્યારે આ ગરમીથી મોરબી જિલ્લો બચી શકયો નથી.મોરબીમાં છેલ્લા 2 સપ્તાહ સુધી તાપમાનનો પારો 44 કે 45 ડીગ્રી વચ્ચે રહ્યો હતો, તો લઘુત્તમ તાપમાન 21 થી 25 ડિગ્રી નોંધાયું હતું. જિલ્લામાં કાળઝાળ ગરમીના કારણે બપોરે આકાશ અને ધરતીમાંથી આગની જ્વાળા નીકળતી હોય તેવો અનુભવ થઈ રહ્યો છે.

આ કાળઝાળ ગરમીના કારણે લૂ લાગવા તેમજ નાના બાળકોમાં તાવ શરદી તેમજ પાણી જન્ય રોગચાળાએ પણ માથું ઉંચક્યું છે. મોરબીના ખાનગી ક્લિનિક તેમજ સિવિલ હોસ્પિટલમાં તાવ શરદીના કેસ વધી રહ્યા છે. સિવિલ હોસ્પિટલમાં તાવ, શરદી, હિટ સ્ટ્રોક સહિતની દરરોજ 100 જેટલી ઓપીડી આવી રહી છે. બીજી તરફ. પીએચસી, સીએચસીઓમાં તાવ પાણી જન્ય રોગ કેસમાં વધ્યા છે.

પ્રજાજનોને સાવચેતી રાખવા માટે અપીલ કરાઇ