કુર્યાત સદા મંગલમ:મોરબીમાં વરિયા પ્રજાપતિ સમાજના 40 યુગલે કન્યાના ઘરે જ વિધિ કરી

મોરબી વાંકાનેરના વરીયા પ્રજાપતિ સમાજ સમિતિએ 34 માં સમૂહ લગ્નનું આયોજન કરાયું હતું. કોરોના મહામારીના કારણે આ વર્ષે સમૂહ લગ્ન સૌના ઘરે જ એટલે કે જાહેર સ્થળ પર નહીં પરંતુ કન્યાના ઘરે જ લગ્ન પ્રસંગ રાખવામાં આવ્યો હતો. આ આયોજનમાં મોરબી, વાંકાનેર અને થાનના વરીયા પ્રજાપતિ સમાજના 40 જેટલા યુગલોએ પ્રભુતામાં પગલાં માંડ્યા હતા.

આ તકે સમૂહલગ્નના આયોજકો અને સમાજના અગ્રણીઓ દ્વારા કન્યાઓને વરીયા માતાજી ફોટાવાળા ચાંદીના સિક્કા, સોનાના દાગીના સહીત 75 વસ્તુઓ કરિયાવરમાં ભેટમાં આપવામાં આવી હતી. જેને અનુલક્ષીને મોરબીના સો ઓરડી વિસ્તારમાં વરીયા મંદિર ખાતે મોરબી-માળીયા (મી.) વિસ્તારના ધારાસભ્ય બ્રિજેશભાઈ મેરજાના હસ્તે મોરબીની કન્યાઓને કરિયાવર અર્પણ કરવામાં આવ્યું હતું. તેમજ ધારાસભ્ય બ્રિજેશભાઈનું વરીયા સમાજના અગ્રણીઓ દ્વારા શાલ ઓઢાડીને સન્માન કરવામાં આવ્યું હતું.

આ તકે પ્રજાપતિ સમાજના આગેવાન ગોકળભાઇ ભોરણીયા, વરીયા પ્રજાપતિ સમાજ સમુહલગ્ન સમિતિના પ્રમુખ ગોકળભાઈ ભોરણીયા તથા ઉપપ્રમુખ પ્રવિણભાઇ વારનેશીયા, પંકજભાઇ વારનેશીયા,નાથાભાઇ સવાડીયા, કાન્તીલાલ કણસાગરા, રાજકોટથી ભાજપના નરેશભાઈ પ્રજાપતિ, રવિભાઇ જોષી સહિતના આગેવાનોના હસ્તે મોરબીની કન્યાઓને કરિયાવર આપવામાં આવ્યો હતો.