આખરે પરિવારને ન્યાય મળ્યો!:મોરબીમાં અઢી વર્ષની માસૂમ સાથે દુષ્કર્મ આચરી હત્યા કરનાર નરાધમને આજીવન કેદ

મોરબી તાલુકાની સિરામિક ફેકટરીમાં રહીને મજુરી કરતા શ્રમિક પરિવારની અઢી વર્ષની માસૂમ દીકરીને ઓરડીમાંથી ઉઠાવી જઈને નરાધમે હવસનો શિકાર બનાવી હતી. બાદમાં બાળકીને તળાવમાં ફેકી દેતા માસૂમનું મોત થયું હતું. જે ચકચારી બનાવ અંગેનો કેસ સ્પેશ્યલ પોક્સો કોર્ટમાં ચાલી જતા કોર્ટે નરાધમને આજીવન કેદની સજા અને દંડ ફટકારતો મહત્વપૂર્ણ ચુકાદો આપ્યો છે.

પી.એમ.માં બાળકી સાથે દુષ્કર્મ થયાનું ખુલ્યું
મોરબીમાં તારીખ 03-05-2018ના રોજ મોરબી નજીક આવેલ સિરામિક ફેકટરીમાં કામ કરતા એમપીના રહેવાસી પરિવારની બાળકી પરિવાર સાથે ઓરડીમાં સુતી હતી. ત્યારે માતા અને પિતા બાથરૂમ કરવા ગયા હતા અને પરત આવી જોયું તો અઢી વર્ષની બાળકી ઓરડીમાં ના હતી. જેને કોઈ ઉઠાવી ગયું હોય જેથી પરિવારે શોધખોળ કરતા તળાવના પાણીમાં ડૂબી જતા બાળકીનું મોત થયાનું ખુલ્યું હતું. બાદમાં ફોરેન્સિક પીએમમાં બાળકી સાથે દુષ્કર્મ આચરવામાં આવ્યું હોવાનું ખુલતા પોલીસે આરોપી સુરજકુમાર ગોરેલાલ ચૌહાણ નામના ઈસમને ઝડપી લીધો હતો અને ગુનો નોંધી કોર્ટમાં ચાર્જશીટ ફાઈલ કરવામાં આવી હતી.

કોર્ટે આરોપીને આજીવન કેદની સજા ફટકારી
જે કેસ મોરબીની સ્પેશ્યલ પોક્સો કોર્ટ અને ફાસ્ટ ટ્રેક સ્પેશ્યલ કોર્ટ ડી.પી.મહિડા સાહેબની કોર્ટમાં ચાલી જતા સરકારી વકીલ સંજયભાઈ સી દવેની ધારદાર દલીલો તેમજ 44 દસ્તાવેજી પુરાવા અને 24 મૌખિક પુરાવાઓ રજુ કર્યા હતા. આ સાથે આરોપીએ માસૂમ બાળકીનું સર્વસ્વ લુંટી લઈને બાળકીની નિર્મમ હત્યા કરી હોવાની દલીલો કરી હતી. જે દલીલોને ધ્યાને લઈને સ્પેશ્યલ પોક્સો કોર્ટે આરોપી સુરજકુમાર ગોરેલાલ ચૌહાણ રહે હાલ રોસાબેલા સિરામિક ઓરડી વાળાને કસુરવાન ઠેરવ્યો હતો અને આરપીને આઈપીસી કલમ 363, 376 (2), 376 એ.બી. અને કલમ 302માં કસુરવાન ઠેરવીને આજીવન કેદની સજા અને રૂ.28,000નો દંડ ફટકારવામાં આવ્યો છે.

ભોગ બનનારના પરિવારને વળતર ચુકવવા આદેશ
મોરબી સ્પેશ્યલ પોક્સો કોર્ટે દુષ્કર્મ અને હત્યાના ગુનામાં ભોગ બનનારના માતા-પિતાને ગુજરાતની ભોગ બનનારને વળતર માટેની યોજના 2019ના નિયમો અનુસાર રૂ.5 લાખ અને આરોપી જે દંડની રકમ રૂ.28.000 ભરે તે મળી કુલ રૂ.5.28 લાખ વળતર પેટે ચુકવવા આદેશ કર્યો છે. આરોપી દંડની રકમ ભરપાઈ કરવામાં નિષ્ફળ જાય તો રૂ.5 લાખ વળતર પેટે ચુકવવા આદેશ કરવામાં આવ્યો છે. જે વળતરની રકમ ચુકવવા જીલ્લા કાનૂની સેવા સત્તા મંડળ, જીલ્લા ન્યાયાલય મોરબીને હુકમ કરવામાં આવ્યો છે.