તપાસ:ઘૂંટુ કોવિડ સેન્ટરમાંથી કોરોનાગ્રસ્ત દર્દી ફરાર, પોલીસ તંત્રમાં દોડધામ, નાકાબંધી કરાઇ

મોરબીના ઘૂંટુના કોવિડ સેન્ટરમાં દાખલ થયેલ કોરોનાગ્રસ્ત દર્દી સ્ટાફ અને પોલીસને ચકમો આપી ફરાર થઈ ગયો હતો. આ અંગેની જાણ થતા પોલીસ દોડતી થઈ ગઈ હતી. અને પોલીસે અનેક સ્થળોએ નાકાબંધી કરી આ દર્દીની શોધખોળ ચલાવી હતી. તંત્ર દ્વારા કોવિડ સેન્ટર ઉભું કરવામાં આવ્યું છે. જ્યાં કોરોનાગ્રસ્ત દર્દીઓની સારવાર કરવામાં આવે છે. આજે આ સેન્ટરમાથી કોરોનાનો એક દર્દી ફરાર થઈ ગયો હતો. આ અંગે સેન્ટરમાં ફરજ બજાવતા કર્મચારીઓએ તુરંત આરોગ્ય તંત્રને અને પોલીસને જાણ કરી હતી. પોલીસ દ્વારા બાયપાસ ચોકડી અને ટંકારા તરફના રસ્તે તુરંત નાકાબંધી ગોઠવી દેવામાં આવી છે.

પોલીસે કોરોનાના ફરાર દર્દીને શોધવા માટે અન્ય અનેક પ્રયાસો પણ હાથ ધર્યા છે. હાલ તો આ ઘટનાથી પોલીસમાં દોડધામ મચી ગઇ છે. ઉલ્લેખનીય છે કે અગાઉ પણ મોરબીમાં અન્ય જિલ્લામાંથી આવેલ એક કોરોનાગ્રસ્ત દર્દી ફરાર થઈ ગયો હોવાની ઘટના બની હતી અને સ્થાનિક તંત્રની લાપરવાહી અને ચાલતા લોલમલોલનો પર્દાફાશ થયો હતો. કોઇ દર્દી આ રીતે સેન્ટરમાંથી આટલા બધા સ્ટાફને ચકમો આપીને નાસી જાય અને સ્ટાફને ખબર પણ ન પડે અને ઉંઘતા રહે એ તો સમાજ માટે નુકસાનરૂપ છે.