ચૂંટણી તંત્રનું ધ્યાન દોરી શકશે:આચારસંહિતા ભંગની ઓનલાઇન રાવ નોંધાવી શકાશે, 9 ફરિયાદના નિકાલનો દાવો

મોરબીએક મહિનો પહેલા
  • કૉપી લિંક
  • ફરિયાદ નોંધાયાની 5 જ મિનિટમાં કામ બતાવી શકાય તેટલી સજ્જતા જિલ્લા ચૂંટણી તંત્રે બતાવી
  • કોઇ પણ નાગરિક C Vigi એપના માધ્યમથી ચૂંટણી તંત્રનું ધ્યાન દોરી શકશે

મોરબી જિલ્લામાં વિધાનસભાની ચૂંટણી દરમિયાન આચાર સંહિતા લાગી ચૂકી છે અને તેની અમલવારી કરવા તંત્ર એક્શન મોડમાં હોવાના દાવો કરી રહ્યા છે તેમ છતાં કોઈ સ્થળે આચારસંહિતાનો ભંગ થતો હોય છે. દરેક સ્થળે તંત્ર પહોંચી શકે તેમ ન હોય જેથી જો કોઈ નાગરિકને આચારસંહિતાનો ભંગ થતો જણાય તો ચૂંટણી તંત્રનું ધ્યાન દોરવા માટે અલાયદી વ્યવ્સ્થા ઉભી કરવામાં આવી છે. હાલ વિવિધ વિસ્તારોમાં થતા આચારસંહિતાના ઉલ્લંઘન અંગે નાગરિકો C-Vigil એપ પર ફરિયાદો કરીને ચૂંટણી તંત્રનું ધ્યાન દોરી રહ્યા છે.

મોરબીના ત્રણેય વિધાનસભા મત વિસ્તારોમાંથી 9 ફરિયાદોનો જિલ્લા ચૂંટણીતંત્ર દ્વારા તાત્કાલિક જ નિકાલ કરાયો હોવાનો દાવો કરવામાં આવ્યો છે.મોરબી જિલ્લાના ત્રણેય વિધાનસભા મતવિસ્તારોમાં મુક્ત અને ન્યાયી વાતાવરણમાં ચૂંટણી યોજવા માટે જિલ્લા ચૂંટણી અધિકારીશ જી.ટી.પંડ્યાના નેતૃત્વમાં તથા નાયબ જિલ્લા ચૂંટણી અધિકારી એસ.એમ.કાથડના માર્ગદર્શન હેઠળ જિલ્લા ચૂંટણીતંત્ર અત્યારે સતત કાર્યરત છે. મોરબી જિલ્લામાં આદર્શ આચારસંહિતા ભંગની ફરિયાદોના નિકાલ માટે ફરિયાદ નિવારણ સેલ કાર્યરત કરવામાં આવ્યો છે.

જે અંતર્ગત આચારસંહિતાના ઉલ્લંઘન કે ભંગ અંગે નાગરિકો ફરિયાદ કરી શકે તે માટે ટોલ ફ્રી હેલ્પલાઇન નંબર ૧૮૦૦ ૨૩૩ ૦૪૨૨ શરૂ કરવામાં આવ્યો છે. ઉપરાંત C-Vigil મોબાઈલ એપ પર પણ ફરિયાદ કરી શકાય છે.મોરબી કલેકટર કચેરી ખાતે કાર્યરત ફરિયાદ નિવારણ સેલમાં C-Vigil એપના માધ્યમથી અત્યાર સુધીમાં 9 જેટલી ફરિયાદો નોંધાઈ છે. આ ફરિયાદોમાં 5ફરિયાદો મોરબી મતવિસ્તારમાં, 3ફરિયાદો ટંકારા મતવિસ્તારમાં અને 1 ફરિયાદ વાંકાનેર મતવિસ્તારમાં નોંધાઈ છે. આમ, કુલ 9 ફરિયાદો નોંધાઇ હતી જેમના પર ત્વરિત કાર્યવાહી કરીને તેનો નિકાલ કરવામાં આવ્યો હતો.

આચારસંહિતાના ઉલ્લંઘન કે ભંગની ફરિયાદોના નિવારણ માટે ચૂંટણીપંચ દ્વારા અસરકારક પદ્ધતિ ગોઠવવામાં આવી છે. જે મુજબ C-Vigil એપ પર કોઈ નાગરિક ફરિયાદ અપલોડ કરે ત્યારે, કન્ટ્રોલ રૂમમાંથી આ ફરિયાદ પાંચ જ મિનિટમાં, જે તે વિધાનસભા મત વિસ્તારની હોય, એ વિસ્તારમાં કાર્યરત ફ્લાઈંગ સ્કવોડને મોકલવામાં આવે છે.

ફ્લાઈંગ સ્કવોડ આ ફરિયાદ પર તુરંત પગલાં લે છે અને વધુમાં વધુ ૧૦૦ મિનિટની અંદર આ ફરિયાદ ઉકેલી નાખે છે. આ ફરિયાદ ઉકેલાઈ ગયાની ખાતરી જે તે મતક્ષેત્રના ચૂંટણી અધિકારી દ્વારા આપવામાં આવે છે.મોરબી જિલ્લાના વિવિધ મતવિસ્તારમાંથી મોટાભાગની ફરિયાદો સરકારી દીવાલો પર પોસ્ટર લગાવવા, જાહેર સ્થળો પર મંજૂરી વિના પોસ્ટર કે બેનર લગાવેલા હોવાની હતી. વિવિધ ફરિયાદમાં જિલ્લા ચૂંટણી તંત્ર દ્વારા નિકાલ લાવવામાં આવ્યો હોવાનો દાવો કરવામાં આવી રહ્યો છે.

અન્ય સમાચારો પણ છે...