નિર્ણય:આકરો (રસીનો નહીં) ડોઝ; મોરબી જિલ્લામાં લમ્પી વાઇરસના કેસ વધી જતાં પશુની હેરફેર પર પ્રતિબંધ

મોરબી9 દિવસ પહેલા
  • કૉપી લિંક
  • વાઇરસ એક પશુમાંથી બીજામાં પ્રસરતો હોવાથી નિર્ણય
  • વેક્સિનેશન, પશુને દવાખાને લઇ જવાના કિસ્સામાં છૂટછાટ

રાજ્યભરમાં પશુઓમાં ખાસ કરીને ગાય તેમજ ગૌવંશમાં લમ્પી વાયરસ ઝડપથી પ્રસરી રહ્યો હોવાથી અનેક પશુ, ગૌવંશ બીમાર પડ્યા છે અને કેટલાય પશુ મોતને ભેટ્યા છે ત્યારે આ રોગને કાબુમાં લેવા સરકાર દ્વારા કેટલાંક સાવચેતીના પગલા લેવામાં આવી રહ્યા છે, અને પ્રવર્તમાન પરિસ્થિતિ અન્વયે અધિક જિલ્લા મેજીસ્ટ્રેટ એન.કે.મુછારે એનિમલ પ્રિવેન્શન એન્ડ કંટ્રોલ ઓફ ઈન્ફેકશિયસ એન્ડ કન્ટેજીસ ડીસીઝ ઇન એનિમલ્સ તથા સી.આર.પી.સી. કલમ-144 હેઠળ નિયંત્રણો મુકવા જાહેરનામું બહાર પાડ્યું છે.

આ જાહેરનામા અનુસાર લમ્પી સ્કીન ડિસીઝ” ને અટકાવવા અને તેને નિયંત્રિત કરી શકાય અને ઢોરને જ્યાં રાખવામાં આવ્યા હોય ત્યાંથી તેમની અવરજવરને પ્રતિબંધિત કરવા મોરબી જિલ્લાની હદની અંદર અથવા બહાર અન્ય સ્થળોએ તેમજ અત્રેના જિલ્લામાં જીવંત પશુઓના વેપાર, મેળા, પ્રદર્શન, રમતો અને આવા પ્રાણીઓના મેળાવડા પર પ્રતિબંધ મૂકવામાં આવ્યો છે.આ જાહેરનામું તા.10 ઓગસ્ટ 2022સુધી અમલમાં રહેશે.આ જાહેરનામા અંતર્ગત વેક્સિનેશન માટે લઇ જવાતા પ્રાણીના અવર-જવર માટે છૂટછાંટ આપવામાં આવી છે.

મોરબી જિલ્લાના 181 ગામમાં 785 પશુને ચેપ
મોરબી જિલ્લામાં આજ સુધીમાં 181 ગામમાં કુલ 785 પશુ આ વાયરસનો શિકાર થયા છે અને તેમની સારવાર કરી છે તો સારવારમાં અથવા એ પહેલાં 23 પશુના મોત થઈ ચૂક્યા છે. જિલ્લાના પશુપાલન વિભાગ તેમજ ડેરી દ્વારા વિવિધ પશુ દવાખાને, 1962 ટીમની મદદથી વેક્સિન આજ સુધીમાં મોરબી જિલ્લામાં 24 ટીમે 43,375 પશુને રસી આપી છે.

1962ને રોજના 200 કોલ આવે છે
મોરબી સહિત સમગ્ર જિલ્લામાં લમ્પી વાયરસના કેસમાં અચાનક ઉછાળો આવતા પશુપાલન વિભાગ અને 1962 હેલ્પલાઈન દોડતી થઈ ગઈ છે. જિલ્લામાં 1962ની 12 મોબાઈલ પશુ સારવાર વાન તેમજ 1 કરુણા હેલ્પલાઇનની 13 ટીમમાં 30થી વધુ કર્મચારીઓ સતત અલગ અલગ ગામમાં ફરી પશુઓની સારવાર અને વેક્સિનેશન કામગીરી કરી રહ્યા છે સાથે સાથે પશુપાલકોને પણ સાવચેતી પગલાં અંગે સમજાવટ કરી રહ્યા છે. મોરબીમાં દૈનિક 200થી વધુ કોલ આવી રહ્યા છે મોરબીમાં કુલ 12 જેટલી 1962 મોબાઈલ પશુ દવાખાના તેમજ 1 કરુણા હેલ્પલાઇનની વાન ઉપલબ્ધ છે તેમ 1962ના પ્રોજેકટ કોર્ડીંનેટર રમેશ સોયાએ જણાવ્યું હતું.

લમ્પીના લક્ષણો દેખાય તે પૂર્વે વેક્સિનેશન કરાવી લેવું
લમ્પી વાયરસના લક્ષણો જણાય એટલે તુરત ચેપગ્રસ્ત પશુને બીજા સ્વસ્થ પશુથી અલગ કરવું,ચરવા માટે છૂટું મુકવુ ન જોઈએ જેથી બીજા પશુમાં રોગ પ્રસરે નહિ,જ્યાં પશુઓ રહે છે ત્યા તાત્કાલિક સફાઈ કરી જંતુનાશક દવાનો છંટકાવ કરવો,તાત્કાલિક રસીકરણ કરાવવું,રોગપ્રતિકારક શક્તિ વધારવા મિનરલ મીક્ષર પાઉડર ખવડાવવું, પશુ જ્યાં રહે છે ત્યાં વરસાદી પાણી ન ભરાય તેમજ ગંદકી ન થાય તેની ખાસ કાળજી રાખવી. - કે.આર.કટારા, પશુપાલન અધિકારી

અન્ય સમાચારો પણ છે...