ઉમેદવારો તલપાપડ:મોરબી જિલ્લામાં પહેલા જ દિવસે 486 ફોર્મ ઉપડ્યા

મોરબી જિલ્લામાં સ્થાનિક સ્વરાજ્ય ચૂંટણીના કાઉન્ટડાઉન શરૂ થઈ ગયા છે. મોરબીની જિલ્લા પંચાયત,5 તાલુકા પંચાયત અને 3 નગરપાલિકાની 230 બેઠક માટે આગામી 28મી ના રોજ યોજાનાર મતદાનને લઇ આજથી ઉમેદવારી ફોર્મ ભરવાની કાર્યવાહી શરૂ થઈ ગઈ છે. પ્રથમ દિવસે જિલ્લા પંચાયતની 24, 5તાલુકા પંચાયત 102 અને 3 નગરપાલિકાની 104 મળી કુલ 230 બેઠક માટે કુલ 486 જેટલા ફોર્મ ઉપડી ગયા હતા.

મોરબીમાં ફોર્મ મેળવવા અને જમા કરવા ચૂંટણી તંત્ર દ્વારા આર. ઓ અને એ આરઓની નિમણુંક કરી દીધી હતી.જેમાં મોરબી નગરપાલિકાની 13 વોર્ડની 52 બેઠક માટે જિલ્લા શિક્ષણ અધિકારીની કચેરી, અને પ્રાંત અધિકારી મોરબીની કચેરી, જ્યારે તાલુકા પંચાયત માટે તાલુકા વિકાસ અધિકારી અને ગ્રામ્ય મામલતદાર કચેરી જિલ્લા પંચાયતની આઠ બેઠક માટે તાલુકા પંચાયત કચેરી ખાતે ફોર્મ જમા અને ઉપાડવાનું સ્થળ નક્કી કરવામાં આવ્યું છે.

પાલિકા માટે 74, જિ. પંચાયત માટે 48, તા. પંચાયતમાં 112 ફોર્મ ગયા
​​​​​​​મોરબી નગરપાલિકા જિલ્લા પંચાયત તાલુકા પંચાયતની ચૂંટણી પ્રક્રિયા અંતર્ગત આજે ઉમેદવારીપત્ર વિતરણ શરૂ થતા જ ઉમેદવારો જાણે ફોર્મ ભરવા જેમાં નગરપાલિકાની ૧૩ વોર્ડની બાવન બેઠકો માટે આજે કુલ ૭૪ ઉમેદવારીપત્ર ઉપડયા હતા. મોરબી જિલ્લા પંચાયતની ચૂંટણી માટે આજના દિવસે કુલ મળી ૪૮ અને મોરબી તાલુકા પંચાયતની ૨૬ બેઠકો માટે સૌથી વધુ કુલ ૧૧૨ ફોર્મ ઉમેદવારોએ મેળવ્યા હતા.જો આજે મોરબીમાં એક પણ ઉમેદવારીપત્ર ભરાઈ ને પરત આવ્યુ ન હતું.

હળવદ તાલુકા અને જિલ્લા પંચાયત માટે 72 ઉમેદવારોએ ફોર્મ ઉપાડ્યા
​​​​​​​હળવદ મામલતદાર કચેરી અને તાલુકા પંચાયત ખાતે તાલુકાના પંચાયતની ૨૦ બેઠકો માટે આજે પ્રથમ દિવસે ૪૮ ફોર્મ ઉપાડવામાં આવ્યા હતા. જ્યારે જિલ્લા પંચાયતની ૫ સીટો માટે ૨૪ ફોર્મ ઉપાડવામાં આવ્યા હતા. જે પૈકી તાલુકા પંચાયતમાંથી ૨૬ અને મામલતદાર કચેરીમાંથી ૨૨ ફોર્મ ઉપડ્યા હતા. જ્યારે જિલ્લા પંચાયતની ૫ બેઠકો માટે આજે કુલ ૨૪ ફોર્મ ઉપડ્યા હતા.

માળિયા મિયાણામાં નગરપાલિકાની બેઠક માટે એકપણ ફોર્મ ન ઉપડ્યું
​​​​​​​માળિયા તાલુકા પંચાયતની 16 બેઠકો માટે કુલ 46 ફોર્મ ઉપડ્યા હતા. પાલિકાની 24 બેઠકો માટે આજે એક પણ ફોર્મ ઉપડ્યું ન હતું. જ્યારે મોરબી જિલ્લા પંચાયતની માળીયા તાલુકામાં આવતી 2 બેઠકો માટે 7 ફોર્મ ઉપડ્યા હતા. તાલુકા પંચાયત અને નગરપાલિકા કચેરી ખાતે ફોર્મ વિતરણની ચાલી રહેલી કામગીરીમાં પાલિકા માટે પાલિકા કચેરીએ ફોર્મ વિતરણ કરવામાં આવી રહ્યા છે.

ગોંડલમાંથી 137 ફોર્મ ઉપડ્યા
​​​​​​​ગોંડલમાં નગરપાલિકા માટે 67 ફોર્મ અને તાલુકા પંચાયત જિલ્લા પંચાયત માટે 77 ફોર્મ ઉપાડ્યા હતા. કોંગ્રેસ શહેર પ્રમુખ આશિષભાઈ કુંડળીયા એ જણાવ્યું હતું કે નગરપાલિકાની 44 બેઠક માટે કોંગ્રેસ દ્વારા ફોર્મ ઉપાડવામાં આવ્યા છે જ્યારે તાલુકા કોંગ્રેસ પ્રમુખ દિલીપભાઈ સોજીત્રાએ જણાવ્યું હતું કે જિલ્લા પંચાયત અને તાલુકા પંચાયતની બેઠકો માટે 54 ફોર્મ કોંગ્રેસ દ્વારા ઉપાડવામાં આવ્યા છે.