સુવિઘા:મોરબીમાં 3.5 લાખના ખર્ચે હેરિટેજ વોક રૂટની LED લાઈટ ફરી શરૂ, રોશનીના પર્વ દિવાળીથી લાઇટ્સનો ઝગમગાટ

મોરબીના હેરિટેજ વોક ગણાતા શક્તિચોકથી જજ બંગલા થઈ પાડા પુલ સુધીના માર્ગ ઉપર આ ઉપરાંત નગરપાલિકા કચેરીથી શાક માર્કેટ સુધી વર્ષો પહેલા લગાવેલી લાઈટ ટેક્નિકલ ક્ષતિ તેમજ આવારા તત્વો દ્વારા પથર મારી લાઈટ તોડી નાખી હોવાથી આ રુટની લાઈટ લાંબા સમયથી બંધ હતી. જો કે પાલિકા દ્વારા શહેરીજનોને ફરી આ ભેટ આપવા સાડા ત્રણ લાખનો ખર્ચ કરી 235 જેટલી લાઈટ લગાવી શહેરીજનોને દિવાળીની ભેટ આપી હતી.અંધકારથી ઉજાશના પર્વનો સંદેશ આપતા દિવાળી પર્વમાં લાઈટ ફરી ઝગમગી ઉઠી હતી.

મોરબીના હેરિટેજ વોક ગણાતા નગરપાલિકા કચેરીએથી શાક માર્કેટ સુધી અને મણિમંદિરના ખૂણેથી વીસી હાઇસ્કુલ સામે ન્યાયાધીશના નિવાસસ્થાન સુધી તેમજ સામે પુલથી વીસી ફાટક સુધીના વિસ્તારમાં રોડ ઉપર પાલિકા દ્વારા વર્ષો પહેલા ખાસ પ્રકારની લાઈટો નાખવામાં આવી હતી.પણ કોઈ ટીખળખોરો દ્વારા આ લાઈટની ચોરી કે તોડફોડ કરાતા હોવાથી વારંવાર લાઈટો નાખવા છતાં બંધ હાલતમાં જ રહેતી હતી.આ લાઈટો લાંબા સમયથી બંધ હતી.આથી પાલિકા તંત્રએ ખાસ તકેદારી રાખી લાઈટોમાં તોડફોડ ન થઈ શકે તે માટે ખાસ સુરક્ષિત લાઈટો નાખી છે.